«Biełaruśfilm» maje źniać mastacki film pra Jeŭfrasińniu Połackuju
Na kinastudyi «Biełaruśfilm» płanujecca źniać karcinu sa statusam «nacyjanalnaha filma».
Pra heta zajaviŭ 14 śniežnia na pres‑kanfierencyi ŭ Minsku pieršy namieśnik ministra kultury Biełarusi Uładzimir Ryłatka.
Pavodle jaho słoŭ, užo adabrany šeść tem, hałoŭnym čynam histaryčnaha charaktaru, jakija mohuć skłaści asnovu «nacyjanalnaha filma».
U ich liku — ideja zrabić ekranizacyju adnaho z najbujniejšych tvoraŭ Uładzimira Karatkieviča i scenaryj, pryśviečany žyćci Jefrasińni Połackaj.
Jak paviedamiŭ Ryłatka, da kanca 2010 hoda płanujecca zaćvierdzić scenaryj «nacyjanalnaha filma». Jon adznačyŭ, što dla zdymkaŭ karciny spatrebiacca značnyja srodki.
Pavodle słoŭ pieršaha namieśnika ministra, u zakonie jość peŭnyja patrabavańni da takoha prajekta. Pa‑pieršaje, heta pavinien być maštabny film, jaki adlustroŭvaŭ by najbolš važnyja padziei nacyjanalnaj historyi. Pa‑druhoje, jon pavinien być stvorany biełaruskimi vytvorcami — režysioram i akciorami. Jak adznačyŭ Ryłatka, kali na «Biełaruśfilmie» pačali zdymać karcinu «Anastasija Słuckaja» (2003), spadziavalisia, što jana stanie
«nacyjanalnym filmam», adnak «z‑za roznych pryčyn» usio ž hety prajekt nie zusim adpaviadaje statusu «nacyjanalnaha».
Hałoŭny redaktar Nacyjanalnaj kinastudyi «Biełaruśfilm» Natalla Ściažko padkreśliła, što ŭ «nacyjanalnym filmie» pavinny paśpiachova spałučacca i scenaryj, i režysior, i srodki, i mahčymaści kinastudyi. Pavodle jaje słoŭ, hety prajekt znachodzicca pad patranažam prezidenta, i, pierš čym prapanavać kiraŭniku dziaržavy štości na zaćviardžeńnie, na «Biełaruśfilmie» pavinny być upeŭnienyja da kanca, što «heta sapraŭdy budzie nacyjanalny prajekt».
