Modnyja promachi, jakija psujuć vyhlad navat samych pryhožych mužčyn. Pakazvajem na prykładach biełarusaŭ
Pryniata ličyć, što biełaruskija mužčyny mała času nadajuć vyhladu, nie lubiać šopinhu i nieachvotna naviedvajuć sałony pryhažości. Naš materyjał — śpiecyjalna dla takich. Bo sapraŭdny styl pačynajecca z małoha.
Rečy ŭ ablipku vizualna padkreślivajuć niedachopy fihury. Fota: instahram Alesia Muchina
Prytalenyja futbołki
Takija majki niaredka sustrakajucca ŭ šafach spartovych chłopcaŭ, i heta całkam zrazumieła. Kali štodzień pracuješ nad svaimi myšcami ŭ spartzale, nadychodzić čas, kali narešcie chočacca atrymać uznaharodu — zachoplenyja pozirki žančyn. Tak u harderobach źjaŭlajucca cišotki ŭ ablipku.
Ale znaročystaja tranślacyja svaich spartovych dasiahnieńniaŭ časta vychodzić bokam. Zdajecca, vystaŭlajučy macavanaje cieła napakaz, mužčyna namahajecca schavać inšyja niedachopy ci ahulnuju niaŭpeŭnienaść u sabie. U vyniku chłopiec u takoj futbołcy vyhladaje nie jak brutalny samiec, a jak «babulin mača» ci repier Meŭł.
Fota: instahram śpiavaka Meŭła
Kab padkreślić pryhožy stan, nie abaviazkova jaho ahalać ci abciahvać. Možna nabyć zvyčajnuju majku i padkatać rukavy da siaredziny bicepsa ci abrać cišotku z panižanaj projmaj — u takoj plečy buduć zdavacca šyrejšymi.
Ale jašče horš vyhladajuć prytalenyja rečy na poŭnych ludziach. U ich harderobach takoje adzieńnie źjaŭlajecca z-za adsutnaści pačućcia asabistych pamieraŭ.
Naprykład, cišotki viadoŭcy i znaŭcy telehulni «Što? Dzie? Kali?» Alesia Muchina vyhladajuć zanadta ciesnymi.
Rečy ŭ ablipku vizualna padkreślivajuć niedachopy. Tamu, kali vy raptam papravilisia, nabyvajcie futbołku pa pamiery — kab dobra vyhladać, pakul viartajeciesia ŭ formu.
Rvany denim ci džynsy «skini»
Kali vy nie padletak, nie ema i nie amatar tvorčaści Mikity Džyhurdy, to ad takich štanoŭ lepš pazbavicca. Vuzkija rvanyja džynsy časta psujuć praporcyju: robiać tułava doŭhim, a nohi — karotkimi.
Fota: instahram śpievaka Rusłana Alachno
U śpievaka Rusłana Alachno dźvie niaŭdałyja madeli. Vyratavać hetyja kamplekty mohuć zvyčajnyja čynasy ci pramyja pakaročanyja džynsy biez detaliroŭki.
Łahatypy znakamitych brendaŭ
Kab padkreślić svoj status, niekatoryja mužčyny pieratvarajucca ŭ chadziačuju rekłamu brendaŭ. Pakazać materyjalny dabrabyt praz adzieńnie namahajucca palityk Juryj Vaskrasienski i błohier Uład Bumaha.
Fota: instahram Vaskrasienskaha i Ułada Bumahi
Luboŭ da hučnych brendaŭ na postsavieckaj prastory isnuje z nahody byłoha deficytu. Ludzi, jakija ŭ 90-ja vyrvalisia z halečy, imknulisia pakazać novy status usimi dastupnymi srodkami — u tym liku i praz łoha na adzieńni. Zvyčka zachavałasia i dahetul.
Ale zamožnyja ludzi, u jakich jość hust, vyhladajuć inakš i ŭ adnosinach da harderobu addajuć pieravahu «cichaj raskošy» — jakasnym rečam biez alapavatych našyvak i z dobrym krojem.
Łakavyja tufli ŭ kamplekcie z džynsami
U luboha aŭtfita jość svajo pryznačeńnie, tamu miksavać u adnym kamplekcie łakavy abutak i denim nie varta — hetyja rečy z zusim roznych stylovych napramkaŭ i pasujuć dla roznych žyćciovych abstavin. Łak padydzie dla važnaha śviata ci teatralnaj premjery, džynsy — dla mierapryjemstva na ŭzrovień nižejšaha.
Fota: instahram Saładuchi
Pa aŭtficie Alaksandra Saładuchi dobra bačny hety dysanans. Łuk atrymaŭsia nieadnarodny i biezhustoŭny.
Zapravić usio!
Zabłytacca ŭ tonkaściach patrabavańniaŭ dres-kodu davoli prosta. Kab nie pamylicca, kali zapraŭlać kašulu, a kali pakidać jaje padoł vypuščanym, treba zapomnić niachitryja praviły.
Kašulu zaŭsiody zapraŭlajuć, kali pad nižnim huzikam pryšytyja zapasnyja — takuju zapraŭlajuć i ŭ štany, i ŭ džynsy; kali ŭ kašuli strohi kaŭnier (naprykład, vysoki na huzikach abo z adkładnymi vuhłami) ci kali vy płanujecie nadzieć jaje sa strohim harnituram.
Navypusk kašulu nosiać, kali jana karotkaja i adnosicca da niefarmalnaha stylu i kali jaje padoł maje zakruhlenuju formu.
Fota: skryn ź videa BiełTA
Švedry, łanhślivy i cišotki zvyčajna nie zapraŭlajucca, ale prafiesar Ihar Marzaluk hetaha nie viedaje. Nie pamyliciesia i vy.
Škarpetki i sandali
Usio čaściej na pakazach viadučych modnych damoŭ sustrakajucca mužčyny-madeli, čyje kamplekty dapaŭniajuć doŭhija škarpetki i sandali. Adnak nie ŭsio, što adbyvajecca na podyumach, znachodzić svajo miesca ŭ paŭsiadzionnym žyćci. Nie nadziavajcie hetyja rečy razam.
Ale lepiej vykarystoŭvać dvojku «sandali i škarpetki», čym źjaŭlacca na publicy biez anijakaha abutku. Hetaje praviła datyčyć padarožžaŭ: u samalotach, aŭtobusach i ciahnikach zdymać abutak — kiepski ton.
Fota: skryn ź videa «Biełaruś 1»
Alaksandr Łukašenka bosy ŭ transparcie nie jeździŭ, ale niejak pryjšoŭ na intervju telekanału «Biełaruś 1» biez abutku. Zrešty, heta nie adzinaje jaho stylistyčnaje dzivactva.
Jak nie pamylicca žančynam, składajučy svoj harderob, možna daviedacca z našaha inšaha materyjału.
A jakija stylistyčnyja pamyłki vy b dadali ŭ hetyja śpisy?
«Naša Niva» — bastyjon biełaruščyny
PADTRYMAĆ
