Minskija budoŭli — 3: Dziciačaja fiłarmonija a-la Carkva Śviatoha Ducha

Kipić praca i na płoščy Svabody. Tut, pamiž adnoŭlenaj u 2004 hodzie ratušaj i Śviata-Duchavym saboram, na miescy kolišniaj carkvy Śviatoha Ducha — jašče adnaho stračanaha niekali elemienta byłoj Ratušnaj płoščy — majuć uźvieści budynak dziciačaj fiłarmonii, jaki vonkava budzie nahadvać razburanuju balšavikami ŭ 1936 hodzie bažnicu.

Pra ambicyjnyja płany «Minskaj spadčyny» stała viadoma ŭ krasaviku hetaha hoda. Michaił Žych, hałoŭny inžynier «Spadčyny», zajaviŭ tady, što «isnavańnie carkvy ŭ jakaści fiłarmonii — dobry fakt, bo «pomniki nie pavinny stanavicca nahodaj kanfliktaŭ pamiž kanfiesijami». Minskija hreka-kataliki adreahavali apieratyŭna.

Stała viadoma, što jany źviarnulisia da Alaksandra Łukašenki z prośbaj dazvolić im pabudavać chram na miescy carkvy Śviatoha Ducha ŭ Vierchnim horadzie. Pad zvarotam padpisalisia doktar histaryčnych navuk Anatol Hryckievič, doktar bahałosłoŭja Iryna Dubianieckaja, doktar fizika-matematyčnych navuk Jury Chadyka, piśmiennik Uładzimir Arłoŭ, paetka Halina Dubianieckaja, archieołah Edvard Zajkoŭski, historyk Anatol Sidarevič. Aŭtary zvarotu vitali adnaŭleńnie carkvy Śviatoha Ducha i vykazali dumku, što viartańnie chramu kanfiesii, jakaja jaho zbudavała, padkreśliła b unikalny polikanfiesijny charaktar Minska, u centry jakoha ŭ XVII-XVIII ctst. znachodzilisia chramy i manastyry Unijackaj, Pravasłaŭnaj i Ryma-Katalickaj Cerkvaŭ.

Adnak zvarot hreka-katalikoŭ plonu nie prynios. U Kamitecie architektury i horadabudaŭnictva im jašče raz adkazali, što na miescy śviatyni budzie budavacca dziciačaja fiłarmonija «z vykarystańniem architekturna-mastackaha vobrazu carkvy Śviatoha Ducha XVII st.». Pra toje ž viałosia i ŭ liście ź Minharvykankamu, tolki tam dadali, što prajekt «adnaŭleńnia budynka byłoj carkvy Śviatoha Ducha ŭ pieršapačatkovym abliččy jak historyka-kulturny, a nie kultavy abjekt», byŭ raspracavany jašče ŭ 1984 hodzie.

Toje, što adnoŭleny budynak budzie tolki vonkavym padabienstvam svajho papiarednika, śviedčyć i toj fakt, što skulptury śviatych na fasadzie zamianiać na arnamient.

Pracy na byłoj Ratušnaj płoščy prynieśli niečakanyja znachodki — u vieraśni byli znojdzienyja krypty z pareštkami fundataraŭ.

***

Carkva Śviatoha Ducha zbudavanaja ŭ pieršaj pałovie XVII st. Naležała da kompleksu ŭnijackaha bazyljanskaha klaštaru. U 1795 h., pry Rasijskaj impieryi, bazyljanski klaštar byŭ začynieny, a carkva addadziena pad kafiedralny pravasłaŭny Pietrapaŭłaŭski sabor. Pry caru jaje pierabudoŭvali na rasijski ład, a za savietami zraŭniali ź ziamloj. Zachavalisia padmurki.

Siamion Piečanko

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH