Minskija budoŭli — 2: Vierchni horad. Pravasłaŭny centr
Na miescy zrujnavanaha čatyry hady tamu domu №27 na vulicy Handlovaj vyras novy budynak, a pobač — ceły kompleks pabudovaŭ.
Na miescy zrujnavanaha čatyry hady tamu domu №27 na vulicy Handlovaj vyras novy budynak, a pobač — ceły kompleks pabudovaŭ.
Toj, chto nie byŭ i Minsku apošnija čatyry-piać hadoŭ, jedučy siońnia pa vulicy Bahdanoviča ŭ bok Opiery, nie paznaje miesca, dzie niekali ŭ padnožžy Śviata-Duchavaha saboru stajaŭ trochpaviarchovy damok.
Toj staraśviecki budynak paŭstaŭ tut u 2-j pałovie XIX—pač. XX st. U savieckija časy tut byŭ studencki internat, u im niekali žyŭ Aleś Adamovič. Naprykancy 80-ch dom chacieli razabrać, ale nieabyjakavyja haradžanie adstajali jaho. Ułady adstupili, zajaviŭšy pra adsutnaść hrošaj. Kamianica była ŭniesienaja ŭ dziaržaŭny Śpis historyka-kulturnych kaštoŭnaściaŭ.
U 1996 hodzie Fond kultury pieradaŭ jaje va ŭłasnaść Ekzarchatu BPC. A mienš čym praz 10 hadoŭ pytańnie pra znos paŭstała iznoŭ — carkva vyrašyła zbudavać na hetym miescy duchoŭna-adukacyjny centr. Niezaležnaje hramadstva admoŭna pastaviłasia da rašeńnia źnieści dom, adnak namieśnik načalnika ŭpraŭleńnia pa achovie historyka-kulturnaj spadčyny Ministerstva kultury Ihar Čarniaŭski zajaviŭ, što jaho demantujuć z pryčyny avaryjnaha stanu. Pry hetym čynoŭnik zapeŭniŭ, što budynak budzie adnoŭleny ŭ pieršapačatkovym vyhladzie ź pieršapačatkovym dekoram. Pratesty hramadskaści nie mieli pośpiechu, u śniežni 2005 hoda dom pa vulicy Handlovaj, 27 razabrali. A zaadno źnieśli i haspadarčyja pabudovy ŭ dvarach, što taksama naležali da Śpisu. Archieałahičnyja raskopki nie pravodzilisia.
Siońnia duchoŭna-adukacyjny centr BPC, jaki finansujecca z respublikanskaha biudžetu i ŭłasnych srodkaŭ carkvy, nabyvaje svaje rysy zhodna płanaŭ jaho stvaralnikaŭ. A jany, płany, treba zaŭvažyć, istotna razychodziacca z zapeŭnivańniami spadara Čarniaŭskaha.
 |
Budynak na miescy razburanaha damka dosyć addalena nahadvaje svajho papiarednika: prynamsi, zašklonaja prybudova na fasadzie, źviernutym da vulicy Bahdanoviča, mała stasujecca ź pieršapačatkovym dekoram. Niekudy źnikli ŭnikalnyja čyhunnyja bałkony, cehłu dla pabudovy vykarystali sučasnuju, adnolkavaha fasonu. Dyj sam novy budynak nie staić ciapier samotna — z boku Katedry da jaho prylapiłasia cerkaŭka, a pustku, što isnavała pamiž raniejšym budynkam i domam №7 pa vulicy Kiryły i Miafodzija, zapoŭniŭ novy dom, vonkavaje azdableńnie jakoha mała nahadvaje pra XVIII st. Zhodna prajekta duchoŭna-adukacyjny centr uklučaje ŭ siabie hrupu pamiaškańniaŭ: carkvu; navučalnyja, administracyjnyja i žyłyja pamiaškańni, aktavuju zału, biblijateku, stałoŭku, haraž, a taksama słužbovyja i techničnyja pamiaškańni. Tak bojlernaja i elektraščytavaja raźmieściacca ŭ cokali budynku XVIII st. na vuł. Kiryły i Miafodzija, 7. Dach u hetym budynku ŭžo nakryli mietaładachoŭkaj, ścieny ŭciaplili termafutram.
