Pačynajecca praces nad Źmitrom i Nastaj Daškievičami za «masavyja biesparadki»
Maskoŭski sud Minska 11 lipienia pačynaje razhlad kryminalnaj spravy muža i žonki Źmitra i Nasty Daškievičaŭ.
Nasta i Źmicier Daškievičy z synam paśla vyzvaleńnia Źmitra z-za krataŭ. 15 krasavika 2017 hoda
Im inkryminujuć č. 1 art. 342 Kryminalnaha kodeksa (udzieł u dziejańniach, jakija hruba parušajuć hramadski paradak). Spravu budzie razhladać sudździa Taciana Pirožnikava. Źmicier u źniavoleńni z 23 sakavika, nahadvaje «Radyjo Svaboda».
U sudzie i Źmicier, i Nasta admovilisia ad dačy pakazańniaŭ.
Na pracesie pieraličvajucca ŭsie aryšty, štrafy i kryminalny pieraśled Źmitra z 1999 hoda.
Jany pryznali na pracesie tolki toje, što sapraŭdy prysutničali na Maršy 23 žniŭnia 2020 hoda. U materyjałach spravy try tamy — jany ahałošvajucca ŭ sudzie.
15 červienia Nasta naradziła syna Daniiła, heta čaćviortaje dzicia ŭ siamji Daškievičaŭ.
Svaboda raskazvała pra historyju kachańnia Daškievičaŭ. U hetaj publikacyi my ŭspaminajem najbolš značnyja zatrymańni i sudy, jakija byli ŭ Źmitra i Nasty.
Jašče da «kryminałki» adsiadzieŭ na sutkach paŭhoda
Pieršaje zatrymańnie Źmitra Daškieviča, jakoje fiksujuć ŚMI, adbyłosia 14 lutaha 2002-ha — bolš za dvaccać hadoŭ tamu. «Małady front» tradycyjna adznačaŭ Dzień śviatoha Valancina. Junaki i dziaŭčaty, niahledziačy na zabaronu haradskich uładaŭ, pajšli centralnym praśpiektam Minska. Maładafrontaŭcaŭ zatrymali na skryžavańni praśpiekta Skaryny (tady jon tak nazyvaŭsia) i Daraševiča.
Zatrymanych było kala tryccaci, ale da suda dajšli spravy tolki šaściarych. Siarod ich byŭ tahačasny lidar «Maładoha frontu», a siońnia palitviazień Pavieł Sieviaryniec, Staś Ivaškievič (siońnia viadomy žurnalist-rasśledavalnik), a taksama Vasil Parfiankoŭ, jaki niadaŭna bieź viestak źnik padčas boju pad Lisičanskam. Byŭ siarod zatrymanych i 20-hadovy Źmicier Daškievič.
Ivaškievič potym raskazvaŭ «Svabodzie», što jaho razam z Daškievičam bili ŭ pastarunku. Urešcie Daškieviču prysudzili 35 «minimałak» štrafu. Na toj momant heta było 350 tysiač rubloŭ (pa tahačasnym kursie — 210 dalaraŭ). Siaredni zarobak u Biełarusi na toj momant składaŭ 95 dalaraŭ.
Pieršyja 10 sutak aryštu Daškievič atrymaŭ u toj ža hod za śviatkavańnie Dnia Voli, tady Źmicier nios bieła-čyrvona-bieły ściah. U kamiery na Akreścina Daškievič siadzieŭ razam ź Sieviaryncam.
Paśla hetaha zatrymańni Daškieviča stali rehularnymi. Jašče da pieršaj svajoj kryminalnaj spravy ŭ 2006 hodzie tolki na «sutkach» Źmicier adsiadzieŭ bolš jak paŭhoda.
Hałasy z-za ścienki
Pa kryminalnaj spravie Źmitra zatrymali ŭpieršyniu 15 vieraśnia 2006 hoda, tady chłopiec sam pryjšoŭ u prakuraturu razam z advakatam. Na toj momant jon užo byŭ kiraŭnikom «Maładoha frontu». Adtul Źmitra pavieźli ŭžo na «Vaładarku». Chłopca abvinavačvali ŭ dziejnaści ad imia niezarehistravanaj arhanizacyi, asudzili na 1,5 hoda kałonii. Pakarańnie jon adbyvaŭ u Škłovie. Na volu vyjšaŭ daterminova 23 studzienia 2008 hoda.
Pa vychadzie z turmy hramadskuju dziejnaść nie spyniŭ. Druhi kryminalny pieraśled Daškieviča pačaŭsia pry kancy 2010 hoda. Jaho zatrymali razam z paplečnikam Eduardam Łobavym (siońnia vajuje va Ukrainie) nibyta za bojku ź minakami. Adbyłosia heta za dzień da asnoŭnaha dnia hałasavańnia na prezidenckich vybarach.
Sud na chłopcami prachodziŭ niezvyčajna. «Paciarpiełyja» nie pakazalisia ŭdzielnikam pracesu, byli tolki čuvać ich hałasy z-za ścienki. Pakazańni jany davali davoli błytanyja, kazali, što mabilnikami nie karystajucca, a na miesca zdareńnia dabralisia na paputkach.
Daškieviča i Łobava asudzili na dva hady kałonii, potym Daškieviču nakinuli jašče hod — za parušeńni ŭmoŭ adbyćcia pakarańnia. Źniavoleńnie kiraŭnik «Maładoha frontu» adbyvaŭ u Horkach, Hłybokim i Hrodnie.
Pratestavaŭ suprać vajny razam z Pratasievičam
Pa vyzvaleńni ŭ 2013 hodzie Daškievič zaniaŭsia pradprymalnickaj dziejnaściu i siamjoj. Tym nie mienš praciahvaŭ udzielničać u akcyjach.
2 sakavika 2014 hoda Daškievič byŭ zatrymany la rasijskaj ambasady, kali vystupiŭ suprać vajny va Ukrainie. Razam ź im i inšymi zatrymali i Ramana Pratasieviča, jaki tady taksama byŭ u «Maładym froncie». Daškieviča aryštavali na 12 sutak. Na 25 sutak zatrymlivali jaho padčas praviadzieńnia ŭ Minsku čempijanatu śvietu pa chakiei ŭ 2014 hodzie.
U vieraśni 2016 hoda Daškieviča zatrymlivali na miažy z Rasijaj u Vietkaŭskim rajonie, kali jon kapaŭ tam akopy razam z paplečnikam Siarhiejem Palčeŭskim. Takim čynam jany chacieli prademanstravać, što rasijskich vojskaŭ u Biełarusi nichto nie čakaje. U milicyi Daškievič skazaŭ, što nie viedaje ruskaj, tamu z urokaŭ dla pierakładu jaho dopytaŭ zdymali nastaŭnic biełaruskaj movy. Za «niezakonnaje źniaćcie ŭradlivaj hleby» jon atrymaŭ štraf u pamiery 220 rubloŭ.
U sakaviku 2017 hodu Źmitra zatrymali, kali jon rabiŭ novuju kuchniu dla piśmieńnika Ŭładzimiera Arłova. Chłopiec zamoviŭ picu, a zamiest jaje pryjechała milicyja. Daškievič byŭ tady zatrymany ŭ ramkach spravy «Biełaha lehijonu», za padrychtoŭku masavych biesparadkaŭ. Mienš jak praź miesiac Źmitra vyzvalili, da sudu sprava nie dajšła.
Apošnija hady Źmicier Daškievič zasiarodziŭsia na abaronie miemaryjała Kurapaty. Praz heta nieadnarazova ŭźnikali kanflikty ź milicyjaj, byli zatrymańni i aryšty. Paśla 15 sutak za ŭdzieł u pratestach 2020 hoda kazaŭ, što nie bačyŭ jašče nikoli takich niaścierpnych umovaŭ, jakija byli stvoranyja tady.
Dapytvała Čamadanava
Pieršaje zatrymańnie Nasty Pałažanki (takoje proźvišča jana nasiła da šlubu) adbyłosia 5 žniŭnia 2005 hoda kala ambasady Polščy ŭ Minsku. Maładafrontaŭcy vykazvali salidarnaść ź niedziaržaŭnym Sajuzam palakaŭ, vyniki źjezdu jakoha nie pryznavali ŭłady. Źmicier Daškievič i Artur Fińkievič atrymali tady pa 10 sutak aryštu, a niepaŭnaletniuju Nastu vyzvalili.
U traŭni 2006 hoda 15-hadovaja Pałažanka ŭdzielničała ŭ haładoŭcy maładafrontaŭcaŭ, jakaja prachodziła suprać palityčna matyvavanych adličeńniaŭ studentaŭ z VNU i vučyliščaŭ.
Tak atrymałasia, što pieršy sud dla Pałažanki byŭ adrazu pa kryminalnaj spravie. Heta było ŭ traŭni 2007 hoda, tady pieciarych maładafrontaŭcaŭ (Chviedaruka, Korbana, Hareckaha, Pałažanku i Janušeŭskaha) sudzili za ŭdzieł u niezarehistravanaj arhanizacyi. Starejšych chłopcaŭ aštrafavali, a dziesiacikłaśnicy Naście prysudzili «prymusovyja miery vychavaŭčaha charaktaru».
Padčas adnaho z zatrymańniaŭ na pačatku 2008 hoda Pałažanku dapytvała asabista budučaja pres-sakratarka MUS Volha Čamadanava.
Pieršy ŭ žyćci administracyjny aryšt Pałažanka atrymała ŭ listapadzie 2008 hoda, praz paru miesiacaŭ paśla paŭnalećcia. Jaje razam ź inšymi maładafrontaŭcami asudzili za ŭdzieł u akcyi nasuprać KDB 7 listapada. Leninski sud Minska aryštavaŭ junakoŭ na troje sutak, na momant abviaščeńnia prysudu hety termin užo skončyŭsia, tamu jany adrazu vyjšli na volu.
Hod umoŭna i zatrymańnie katalikami
Mabyć, adno z najbolš aryhinalnych zatrymańnia zdaryłasia z Nastaj Pałažankaj u lipieni 2009 hoda, kali jaje zatrymali družyńniki na sustrečy katalickaj moładzi ŭ Iviancy. Nasta razdavała buklety «Ściah i hierb Biełarusi». Družyńniki zdali dziaŭčynu ŭ milicyju, dzie na jaje skłali pratakoł.
U śniežni 2010 hodu Nastu zatrymali za padziei Płoščy. U turmie KDB jaje pratrymali da 17 lutaha. Sudzili Nastu razam z Uładzimiram Niaklajevym, Vitalom Rymašeŭskim, Alaksandram Fiadutam, Andrejem Dźmitryjevym i Siarhiejem Vaźniakom. Dziaŭčyna atrymała hod umoŭna. Paźniej Nasta pryznałasia, što była vymušanaja padpisać papieru ab supracoŭnictvie z KDB, ale ahientku ź jaje nichto nie sprabavaŭ zrabić.
Paśla hetaha Nastu jašče nieadnarazova zatrymlivali za ŭdzieł u samych roznych akcyjach pratestu, prysudžali joj administracyjnyja aryšty.
