«Źjavilisia destruktyŭnyja pavodziny». Na 15 sutak aryštavali žančynu, jakuju zatrymali pierad sudom nad Babarykam
58-hadovuju Taćcianu Piatrukovič zatrymali 24 červienia pierad pačatkam suda nad Viktaram Babarykam. U sumcy žančyny znajšli BČB-nalepki, tamu supracoŭniki zatrymali žančynu i advieźli ŭ Maskoŭskaje RUUS. Ale tam na Tiaćcianu skłali pratakoł za drobnaje chulihanstva pa art. 19.1 KaAP, paviedamlajuć pravaabaroncy.
Spravu Piatrukovič 25 červienia razhladzieła sudździa Maskoŭskaha rajona Taćciana Motyl. Zhodna z pratakołam, žančyna «padčas prafiłaktyčnaj hutarki hučna kryčała, razmachvała rukami, niecenzurna łajałasia, uskokvała z kresła, na zroblenuju zaŭvahu spynić supraćpraŭnyja dziejańni nie reahavała». Taćciana skroź ślozy heta admaŭlaje, bo navat «nikoli ŭ žyćci nie łajałasia».
«Ja znachodziłasia ŭ RUUSie, kudy mianie pryvieźli na prafiłaktyčnuju hutarku, i heta niemahčyma, kab ja maciukałasia abo ŭskokvała, bo adzinaje, što ja rabiła, — płakała. Pratakoł nie składali, a vydali tolki papiaredžańnie, što hutarka ŭžo adbyłasia, u jakoj ja raśpisałasia, i tady jana pačałasia», — tłumačyła Tiaćciana sudździ.
Padčas hutarki milicyjanty pytali ŭ žančyny, «ci viedaje jana palityku dziaržavy i što takoje BČB-ściah». Śviedka Ivanoŭ Ivan Ivanavič na sudzie zajaviŭ, što «ŭ Piatrukovič źjavilisia destruktyŭnyja pavodziny, jana ŭstavała z kresła».
Z tłumačeńnia śviedki Ivanova:
«Ja jaje nie zatrymlivaŭ, a na hutarku jaje pryviali inšyja supracoŭniki. Ja pačaŭ joj tłumačyć, što jana ŭžo pryciahvałasia pa art. 23.34 KaAP, a jana pačała kryčać, što nie zhodnaja. Piatrukovič mianie pierabivała, pavyšała ton, destruktyŭna pavodziła siabie i była niedastatkova vietlivaja. Videarehistratara pry sabie nie było, bo jon lažaŭ u mašynie. Prafiłaktyčnaja hutarka była sarvanaja, tamu ja nie paśpieŭ zapoŭnić pratakoł. U mianie rybina pamiać, tamu ja nie zapomniŭ, va što Piatrukovič była apranutaja, i nie viedaju, jaki ŭ jaje rost, bo liniejki z saboju nie było».
Taksama Taćciana zajaviła, što pratakoł nie čytała, bo joj nie dali akulary, niahledziačy na nieadnarazovyja prośby.
Sudździa Motyl paličyła vinu Taćciany całkam dakazanaj, tamu pakarała jaje 15-sutačnym aryštam.
