Kaho paklikali na «pracoŭnuju sustreču» Łukašenki z duchavienstvam?
Śviataroŭ było mieniej za čynoŭnikaŭ.
Telehram-kanał pres-słužby Łukašenki «Puł pieršaha» paviedamiŭ, što Łukašenka pravodzić u Žyrovičach «rabočuju sustreču» z duchavienstvam.
Mnohim śviataram takaja farmuloŭka nie duža spadabałasia. Farmalna ŭ Biełarusi carkva adździelena ad dziaržavy. Na spravie ž nibyta idzie sustreča z padnačalenymi. Chto ž byŭ zaprošany na naradu?
Adrazu skažam, što śviataroŭ była mienšaść. Ź dzieviaciarych prysutnych — tolki troje. Heta mitrapalit Minski i Zasłaŭski Vienijamin, dla jaho sustrečy z Łukašenkam nie redkaść. Jon siadzieŭ bližej za astatnich da kiraŭnika krainy. Aficyjna Vienijamin taksama źjaŭlajecca nastajacielem Śviata-Uśpienskaha manastyra ŭ Žyrovičach.
Taksama prysutničaŭ na sustrečy archijepiskap Navahrudski i Słonimski Huryj, jaki źjaŭlajecca namieśnikam nastajaciela manastyra. Huryj viadomy svaimi kansiervatyŭnymi pohladami, a taksama paśladoŭnaj padtrymkaj dziejnaj ułady. Taksama na sustreču paklikali novaha jepiskapa Hrodzienskaha i Vaŭkavyskaha Antonija, jaki źmianiŭ apalnaha ŭładyku Arciemija. Bolš nikoha z duchavienstva nie było.
Ź śvieckich asobaŭ na sustrečy byli śpikier Savieta Respubliki Natalla Kačanava, kiraŭnik Administracyi prezidenta Ihar Sierhiejenka, vice-premjer pa sacyjalnych pytańniach Ihar Pietryšenka, kiraŭnik Hrodzienskaj vobłaści Uładzimir Karanik, a taksama ŭpaŭnavažany pa spravach relihij Alaksandr Rumak.
