Cichanoŭskaja praviała pieramovy z kiraŭnikami MZS Luksiemburha, Bielhii i Słavienii
Cichanoŭskaja praviała pieramovy z kiraŭnikami MZS Luksiemburha, Bielhii i Słavienii — kab ahučyć pazicyju pierad siońniašniaj Radaj ministraŭ zamiežnych spraŭ ES.
Sustrečy prajšli ŭ Luksiemburhu ŭ niadzielu ŭviečary. Cichanoŭskaja padziakavała ministram za adzinuju, vyraznuju i mocnuju pazicyju i za toje, što ŭsie 27 krain ES padtrymali 4-y pakiet sankcyj.
Cichanoŭskaja padziakavała ministru zamiežnych spraŭ Luksiemburha Žanu Asielbornu za niepryznańnie Łukašenki i admovu ambasadara ŭručać jamu davierčuju hramatu. U svaju čarhu ministr zapeŭniŭ Cichanoŭskuju ŭ adnaznačnaj padtrymcy biełarusaŭ i ŭsioabdymnaha płana ekanamičnaj dapamohi Biełarusi.
U razmovie ź ministarkaj zamiežnych spraŭ Bielhii Safi Vilmies Cichanoŭskaja ŭźniała pytańnie bolš efiektyŭnych sankcyj.
Kiraŭnika MZS Słavienii Anže Łahara Cichanoŭskaja zaklikała pastavić Biełaruś na paradak dnia ŭ ES, «bo demakratyja ŭ Biełarusi moža stać ahulnaj historyjaj pośpiechu ES». Taksama jany abmierkavali ŭdzieł Biełarusi ŭ samicie Uschodniaha partniorstva — Biełaruś mohuć pradstaŭlać demakratyčnyja siły.
Cichanoŭskaja: «Biełaruś abjadnoŭvaje samich biełarusaŭ i ŭsiu Jeŭropu. Usie 27 krain ES u adzin hołas kažuć, što treba vyzvalić palitviaźniaŭ i pravieści svabodnyja vybary. Ja rada, što ŭ nas stolki siabroŭ».
Siońnia Śviatłana Cichanoŭskaja vystupić pierad ministrami zamiežnych spraŭ ES sa zvarotam. Jana adkaža na ich pytańni, paśla čaho MZS pavinny pryniać rašeńnie pa sankcyjach.
