Krynicy: Pad sankcyi ES padpaduć naftachimija, kalijnaja śfiera i telekamunikacyi
Taksama ŭzhodnienaja zabarona na vydaču Biełarusi kredytaŭ, handal kaštoŭnymi papierami i inviestycyjnyja pasłuhi.
Aŭstryjskaje ahienctva druku (APA) sa spasyłkaj na svaje krynicy paviedamiła, što krainy Jeŭrasajuza ŭzhadnili sankcyi suprać Biełarusi ŭ naftahazavaj śfiery, halinach telekamunikacyj i vytvorčaści kalijnych uhnajeńniaŭ. Taksama ŭzhodnienaja zabarona na vydaču Biełarusi kredytaŭ, handal kaštoŭnymi papierami i inviestycyjnyja pasłuhi.
Upieršyniu suprać Biełarusi buduć uviedzienyja siektaralnyja sankcyi. Raniej abmiežavalnyja miery ES nasili pieravažna simvaličny charaktar vizavych sankcyj.
Adnosiny Biełarusi i krain Jeŭrasajuza rezka pahoršali paśla vybaraŭ 2020 hoda, jakija supravadžalisia aryštami spačatku palityčnych apanientaŭ Alaksandra Łukašenki, a paśla i demanstrantaŭ, jakija patrabavali rasśledavańnia vybarčych falsifikacyj.
U Biełarusi narastała antyzachodniaja prapahanda, a niekatorych palityčnych praciŭnikaŭ uładaŭ, jakija znajšli prytułak u krainach ES, Minsk abviaściŭ terarystami.
Adnosiny Biełarusi z krainami ES dasiahnuli najnižejšaha punktu paśla zabarony partała Tut.by 18 maja i pasadki samalota kampanii «Rajanejr» u Minsku 23 maja. U Jeŭropie hety incydent nazvali «aktam dziaržaŭnaha teraryzmu» i paabiacali chutki i strohi adkaz.
Minsk pahražaŭ adkazać ekanamičnymi mierami suprać jeŭrapiejskaha biznesu. Ministr zamiežnych spraŭ Biełarusi Uładzimir Makiej taksama namiakaŭ, što pad udaram akažacca hramadzianskaja supolnaść Biełarusi i zaklikaŭ Zachad «adumacca».
