Zatrymanych hledačoŭ na śpiektakli «Bieły trusik, Čyrvony trusik» karajuć 15-sutačnymi aryštami
16 červienia ŭ čyrvonym dvoryku, ŭ centry Minska, pavinna była adbycca premjera śpiektakla «Bieły trusik, Čyrvony trusik». Praź niekalki chvilin paśla pačatku tudy pryjšli supracoŭniki milicyi i zatrymali kala vaśmi hledačoŭ i siabroŭku Kaardynacyjnaj Rady Aksanu Zareckuju, jakaja arhanizavała prahlad śpiektakla, paviedamlajuć pravaabaroncy.
Zatrymanych advieźli ŭ Centralny RUUS, dzie na ŭsich skłali pratakoły za nibyta niepadparadkavańnie supracoŭnikam milicyi pa art. 24.3 KaAP. Uviečary čatyroch žančyn, u jakich jość niepaŭnaletnija dzieci, vypuścili z pratakołami da suda, a astatnich pieraviali na Akreścina.
Čytajcie taksama: «Praz 10 chvilin paśla pačatku pryjšli siłaviki». Što adbyłosia na śpiektakli z udziełam Zareckaj
17 červienia spravy hledačoŭ śpiektakla razhledzieli ŭ sudzie Centralnaha rajona. Spravy 34-hadovaha Mikity Ramankina i 25-hadovaj Alii Sajed razhladzieŭ sudździa Alaksandr Pietraš. Jon aryštavaŭ minčukoŭ na 15 sutak kožnaha.
Spravu 48-hadovaj Śviatłany Miaščaninavaj razhladaŭ sudździa Dźmitryj Karsiuk. Žančynu, jak i inšych, abvinavacili ŭ tym, što «na terytoryi RUUSa kala 19:40 Śviatłana akazała niepadparadkavańnie supracoŭniku milicyi». Pa słovach Śviatłany, Aksana Zareckaja zaprasiła jaje na siabroŭskuju sustreču dla prahladu śpiektakla, u jakim u jaje adbyŭsia debiut u jakaści aktrysy. Žančyna patłumačyła, što «pryjšła kala 18:30 na vulicu Revalucyjnuju i čakała pačatku pastanovy, ale, jak tolki na manitory ŭklučyŭsia śpiektakl, adrazu pryjšli mužčyny ŭ cyvilnym i pastavili ŭsich tvaram da ściany». Miaščaninava śćviardžaje, što dobraachvotna prajšła za supracoŭnikami i nichto z zatrymanych niepadparadkavańnie supracoŭnikam nie akazvaŭ. Jana źviarnuła ŭvahu sudździ, što supracoŭniki zdymali ŭsio na videa, jakoje mahło b paćvierdzić jaje słovy.
Sudździa Dźmitryj Karsiuk pakaraŭ Miaščaninavu 15-sutačnym aryštam.
Čakajecca sud nad jašče adnym zatrymanym.