Wargaming vykupiła 76 kvater u Vilni
Kampanija Wargaming vykupiła 76 kvater u žyłym kompleksie Tower na praśpiekcie Kanstytucyi ŭ stalicy Litvy. «Niečuvanaja ździełka ŭ Vilni: chmaračos zapoŭniać biełarusy», — z takim zahałoŭkam vyjšaŭ materyjał u litoŭskim vydańni Irytas.lt, adznačaje dev.by.
Pavodle acenak ekśpiertaŭ, suma ŭhody moža dasiahać 20 młn jeŭra.
Irytas.lt piša taksama pra toje, što 29-paviarchovy Tower — daŭhabud, jaho pieršaja nazva — Arfa. Dziesiacihodździe chmaračos stajaŭ pustym, i tolki paru hadoŭ tamu, paśla pieradačy novamu zabudoŭščyku, budoŭlu zaviaršyli. Jakaść budaŭnictva ŭ kompleksie ŭ svoj čas aktyŭna krytykavali: kazali ab tym, što padmurak padtaplajecca, ścieny treskajucca, budynak, maŭlaŭ, praściej źnieści i pabudavać nanova.
Z vykuplenych kvater biełarusy zmohuć lohka dabracca da svaich pracoŭnych miescaŭ. BC Quadrum, u jakim Wargaming zajmaje piać pavierchaŭ płoščaj amal 5 tysiač kv. m, znachodzicca niepadalok, taksama na praśpiekcie Kanstytucyi.
Vilenski ofis Wargaming byŭ adkryty ŭ krasaviku, jaho ŭznačaliŭ były hienieralny dyrektar ahienctva «Invest Lithuania» Mantas Kacinas. Karparacyja płanuje paetapna, na praciahu 3-4 hadoŭ, stvaryć u Vilni da 400 novych pracoŭnych miescaŭ.
