«Abmiarkujuć praktyčna ŭsie temy»: u Kramli raskazali pra płan zaŭtrašniaj sustrečy Bajdena i Pucina
Sustreča prezidentaŭ Rasii i ZŠA Uładzimira Pucina i Džo Bajdena, jakaja projdzie ŭ Ženievie 16 červienia, pačniecca ŭ 13:00.
Fota 2011 hoda. TASS
Pra heta na bryfinhu zajaviŭ žurnalistam pamočnik rasijskaha lidara Juryj Ušakoŭ, piša RBK.
Pa słovach Ušakova, Pucin pryjedzie ŭ Ženievu ŭ sieradu. Na vile La Grange jaho sustrenie prezident Šviejcaryi Hi Parmielen, zatym tudy prybudzie Bajden. Paśla cyrymonii fatahrafavańnia i vystupleńnia Parmielena pačniecca samit Pucina i Bajdena.
«Pieramovy zapłanavanyja z troch častak. Pieršaja — razmova ŭ vuzkim składzie, potym u pašyranym. Potym nievialiki pierapynak na harbatu i kavu i paśla praciah pieramovaŭ», — raspavioŭ Ušakoŭ. Zatym prezidenty paasobku vystupiać na pres-kanfierencyjach, i paśla zaviaršeńnia samitu Pucin sustreniecca z šviejcarskim kaleham, paviedamiŭ pamočnik prezidenta.
Adkazaŭ Ušakoŭ na pytańnie, ci budzie abmiarkoŭvacca situacyja ŭ Biełarusi.
«Prezidenty mohuć padniać lubuju temu, u tym liku i Biełaruś. Ja znoŭ-taki nie vyklučaju, što amierykancy hetuju temu zakranuć, tym bolš, što jany abmierkavali heta ŭsio z sajuźnikami, i ŭ kole NATA, i ŭ kole ES ciapier budzie abmierkavańnie. Kali navat amierykancy zabuduć niejkuju temu, to im nahadajuć, što skazać treba», — skazaŭ jon.
U rasijskuju delehacyju na pieramovach z amierykanskim bokam, akramia Ušakova, uvojduć, u pryvatnaści, kiraŭnik MZS Siarhiej Łaŭroŭ, pres-sakratar prezidenta Dźmitryj Piaskoŭ, ambasadar Rasii ŭ ZŠA Anatol Antonaŭ, kiraŭnik Hienštaba Valeryj Hierasimaŭ i namieśnik kiraŭnika MZS Siarhiej Rabkoŭ. Taksama na ich zaprasili namieśnika kiraŭnika administracyi prezidenta Dźmitryja Kozaka i śpiepradstaŭnika pa siryjskim urehulavańni Alaksandra Łaŭrenćjeva.
Pa słovach Ušakova, u pieramovach u vuzkim składzie z rasijskaha boku budzie ŭdzielničać Łaŭroŭ, z amierykanskaj — dziaržsakratar Entani Blinkien.