«Hazpram» płanuje rezka skaracić tranzit hazu praź Biełaruś paśla zapusku «Paŭnočnaha patoku — 2»
Pra heta stała viadoma z kantrakta «Hazprama» z AAT «Hazpram transhaz Biełaruś» na tranzit hazu ŭ Jeŭropu ŭ 2021 hodzie.
«Hazpram» płanuje rezka skaracić tranzit hazu praź Biełaruś pačynajučy z 4-ha kvartała 2021 hoda.
Pra heta stała viadoma z kantrakta «Hazprama» z AAT «Hazpram transhaz Biełaruś» na tranzit hazu ŭ Jeŭropu ŭ 2021 hodzie, apublikavanaha napiaredadni hadavoha schodu akcyjanieraŭ rasijskaha hihanta.
Zhodna z dakumientam, zadańnie dla kampanii «Hazpram transhaz Biełaruś» na transpartavańnie hazu na 2021 hod u Zachodniuju Jeŭropu składaje 29,574 młrd kub. mietraŭ, u tym liku: I kvartał — 9,626 młrd kub. mietraŭ, II kvartał — 9,183 młrd kub. mietraŭ; III kvartał — 8,842 młrd kub. mietraŭ, IV kvartał — 1,923 młrd kub. mietraŭ.
Takim čynam, tranzit hazu skarocicca amal na 8 młrd kuboŭ u kvartał, abo na 80%.
Haz praź Biełaruś prapampoŭvajecca pa transnacyjanalnym hazapravodzie «Jamał-Jeŭropa» mahutnaściu 32,9 młrd kubamietraŭ u hod u Polšču i Niamieččynu. Akramia taho, pa inšaj halincy hazapravoda rasijski haz praź Biełaruś pastupaje ŭ Litvu, a praź jaje — u Kalininhradskuju vobłaść.
Da hetaha hoda «Jamał-Jeŭropa» byŭ zahružany na poŭnuju katušku, bo «Hazpramu» było vyhadniej pasyłać błakitnaje paliva praź Biełaruś, a nie praz Ukrainu. «Hazpram transhaz Biełaruś» na 100% naležyć rasijskaj kampanii, a tamu taryfy na prapampoŭku hazu praz našu krainu minimalnyja.
Płanavanaje źnižeńnie tranzitu praź Biełaruś, musić, źviazana z chutkim puskam novaha hazapravoda pa dnie Bałtyjskaha mora «Paŭnočny patok — 2». ZŠA vyčarpali mahčymaści dalej błakavać jaho budaŭnictva.
Pasyłać haz pa «Paŭnočnych patokach» vyhadniej, bo nie treba płacić krainam-tranziciorkam.
Čamu ž Maskva płanuje skaracić prapampoŭku praź Biełaruś, a nie praz Ukrainu? Matyvy tut mohuć być dva.
Na siońnia ŭ «Hazprama» kantrakt z Ukrainaj zaklučany pa pryncypie «pampuj abo płaci». Heta značyć, navat kali «Hazpram» źnizić tranzit praz Ukrainu, jon pavinien budzie apłacić zakantraktavanyja abjomy.
Taki kantrakt z Ukrainaj piacihadovy, jon zakančvajecca ŭ kancy 2024 hoda.
Pa-druhoje, Polšča nie maje namieru praciahvać kantrakt na pastaŭki hazu «Hazpramam» paśla 2022 hoda, kali jon minaje. Jasnaści pa dalejšym tranzicie hazu praz Polšču paśla 2022 hoda niama. Vierahodna, budzie torh.
Bolš za toje, jeŭrapiejskija palityki nie vyklučali zabarony tranzitu hazu praź Biełaruś, kali Minsk budzie praciahvać ciapierašniuju palityku: Jeŭropa rasceńvaje mnohija kroki ciapierašniaha biełaruskaha kiraŭnictva jak varožyja, asudžaje parušeńni pravoŭ čałavieka, baicca pieratvareńnia našaj krainy ŭ Paŭnočnuju Kareju ŭ centry Jeŭropy i narastańnia rasijskaha kantrolu nad Biełaruśsiu.
Jak by tam ni było, kali abjomy prapampoŭvańnia hazu praź Biełaruś źniziacca, naša kraina stracić značnyja padatkovyja pastupleńni. Biełaruski biudžet moža niedaličycca kala 250-300 młn dalaraŭ u hod.
Pakul ni biełaruskija, ni rasijskija ŭłady nie prahavorvali, ci maje Maskva namier kampiensavać Minsku hetyja straty ŭ vypadku, kali skaračeńnie tranzitu sapraŭdy adbudziecca.
