Na Bierlinskim mižnarodnym kinafiestyvali adbyłasia akcyja salidarnaści ź biełaruskimi palitviaźniami
Miescam akcyi stała placoŭka, dzie prachodziła publičnaja premjera filma «Śmiełaść» pra biełaruskija pratesty. Pierad prahladam karciny na zaklik režysiora Alaksieja Pałujana hledačy ŭźniali nad saboj partrety palitviaźniaŭ.
Pavodle zadumy kožny musiŭ znajści na svaim kreśle kartačku palitviaźnia i jak by razam z hetym čałaviekam, što fizična nie moža prysutničać na pakazie, pahladzieć film.
«Ja chacieŭ, kab ludzi pahladzieli «Śmiełaść» razam ź biełaruskimi palitviaźniami, uziali ich partrety dadomu, pa mažlivaści sieli i napisali im list. Na advarotnym baku kartačak znachodzicca historyja čałavieka, niešta asabistaje pra jaho i artykuł, pa jakim jaho katujuć. Heta spakojnaja akcyja, biez słoŭ — usio pa-biełarusku», — skazaŭ Alaksiej Pałujan.
Haściami siońniašniaj premjery «Śmiełaści» stali Śviatłana Cichanoŭskaja sa svaim štabam i Śviatłana Aleksijevič. Razam ź niamieckaj pradziusarkaj Simonaj Baŭman i Alaksiejem Pałujanam Śviatłany paŭdzielničali ŭ panelnaj dyskusii, dzie abmierkavali rolu tvorcy ŭ aŭtarytarnaj sistemie.
Film raspaviadaje pra troch akcioraŭ Marynu Jakubovič, Dzianisa Tarasienku i Paŭła Haradnickaha, jakija pracavali ŭ Svabodnym teatry i zaśpieli padziei žniŭnia minułaha hoda. Na Bierlinale «Śmiełaść» naminujecca na ŭznaharodu «Najlepšy dakumientalny film».
