Intensiŭnyja treniroŭki mohuć pavialičyć ryzyku chvaroby ruchalnaha niejrona
Ale bolšaść ludziej nie maje schilnaści da chvaroby ruchalnaha niejrona, tamu, papiaredžvajuć navukoŭcy, admaŭlacca ad nahruzki ŭsim zapar nie varta.
Fota pixabay.com.
Navukoŭcy kažuć, što rehularnyja i ciažkija fizičnyja praktykavańni pavialičvajuć ryzyku chvaroby ruchalnaha niejrona ŭ hienietyčna schilnych ludziej. Ale pry hetym kamanda z Šefiłdskaha ŭniviersiteta, jakaja praviała hetaje daśledavańnie, zapeŭnivaje, što biez pryčyny admaŭlacca ad trenirovak nie varta.
Vučonyja spadziajucca, što novyja danyja dazvolać znajści ludziej, jakija bolš za inšych ryzykujuć atrymać chvarobu, i dać śpiecyjalna padabranyja dla ich parady, piša VVS.
Chvaroby ruchalnaha niejrona sustrakajucca prykładna ŭ kožnaha trochsotaha čałavieka. Chvaroba ruchalnaha niejrona taksama maje nazvu bakavy amijatrafičny skleroz (BAS), abo chvaroba matornych niejronaŭ. Heta zachvorvańnie charaktaryzujecca paškodžańniem vierchnich niejronaŭ hałaŭnoha mozha z nastupnym parušeńniem ich suviazi sa śpinnym mozham. Parušajecca pieradača sihnałaŭ ad hałaŭnoha mozha da muskułaŭ, u vyniku čałaviek hublaje zdolnaść ruchacca, razmaŭlać i navat dychać. U vyniku zachvorvańnia raźvivajecca paralič ŭsiaho cieła. Praciahłaść žyćcia taksama moža značna skaracicca.
Navukoŭcy dahetul drenna razumiejuć, chto i čamu atrymlivaje takuju chvarobu. Chutčej za ŭsio, pryčyny treba šukać u hienietycy, a taksama ŭ navakolnym asiarodździ čałavieka. Daŭno isnavała dumka, što jość suviaź pamiž fizičnymi praktykavańniami i chvarobaj.
Ciapier ža navukoŭcy ŭ hetym upeŭnienyja. Padčas daśledavańnia vyśvietliłasia, što niekatoryja z hienaŭ, adkaznych za chvarobu ruchalnaha niejrona, u adkaz na fizičnyja praktykavańni pačynajuć dziejničać pa-inšamu. Pryčym, ludzi z hienietyčnaj mutacyjaj, jakaja viadzie da chvaroby, pačynajuć chvareć joju ŭ bolš rańnim uzroście, kali pierahružajuć siabie fizičnymi praktykavańniami.
Navukoŭcy ŭdakładniajuć, što miaža niebiaśpiečnaj nahruzki dla takich ludziej — heta zaniatki pa 15—30 chvilin z častatoj dva-try razy na tydzień. Ale bolšaść ludziej nie maje schilnaści da chvaroby ruchalnaha niejrona, tamu, papiaredžvajuć navukoŭcy, admaŭlacca ad nahruzki ŭsim zapar nie varta.
