«Paŭnočny patok — 2» pačynajuć zapaŭniać hazam
Budaŭnictva marskoj častki pieršaj nitki hazapravodu «Paŭnočny patok — 2» pa dnie Bałtyjskaha mora z Rasii ŭ Hiermaniju zavieršanaje, z 11 červienia pačnucca puskanaładačnyja raboty, piša Radyjo Svaboda.
Pra heta zajaviła ŭ čaćvier kampanija-aperatar trubapravodu. Pavodle jaje, 10 červienia vykładzienyja z boku Rasiei i Niamieččyny marskija sekcyi hazapravodu byli złučanyja pamiž saboj. Ź piatnicy pačnucca raboty pa zapaŭnieńni hazapravoda hazam.
Heta nie aznačaje, što hazapravod budzie ŭ najbližejšy čas zapuščany ŭ ekspluatacyju, — čakajecca, što puskanaładačnyja raboty praciahnucca niekalki miesiacaŭ. Akramia taho, hazapravod pavinien prajści sertyfikacyju i inšyja pracedury.
Ab zaviaršeńni prakładki trub pieršaj nitki hazapravoda paviedamiŭ 4 červienia ŭ pramym efiry rasiejski prezydent Uładzimir Pucin. Heta stała niečakanaściu, pakolki raniej paviedamlałasia, što zastajecca pakłaści jašče niekalki dziasiatkaŭ kilametraŭ trub.
Praciahvajecca kładka druhoj nitki hazapravoda.
Kładka trub była spynienaja ŭ śniežni 2019 hodu bolš čym na hod praz pahrozu sankcyj ZŠA. U pačatku 2021 hodu jaje adnavili rasiejskija karabli. Jany, jak i kampanii-ŭładalniki, byli ŭniesieny Vašynhtonam u sankcyjny śpis. ZŠA, adnak, nia stali nakładvać sankcyi na kampaniju-aperatara «Paŭnočnaha patoku — 2», zasnavanuju rasiejskim «Hazpromam».
Administracyja ZŠA padkreślivaje, što vystupaje suprać budaŭnictva hazapravodu, ličačy jaho pahrozaj enerhietyčnaj biaśpieki EZ i Ŭkrainy. Adnak i prezydent ZŠA Džo Bajden, i dziaržsakratar Entani Blinkienzajaŭlali, što pieraškodzić dabudoŭcy hazapravoda praz sankcyi było b vielmi prablematyčna, akramia taho, sankcyi suprać niamieckich kampanij, jakija ŭdzielničajuć u budaŭnictvie, mahli b zakranuć supracoŭnictva ZŠA i Niamieččyny.
Vašynhton i Bierlin praciahvajuć pieramovy pra los prajektu — u pryvatnaści, ab mahčymych harantyjach Ukrainie, jakija mahli b stać umovaj pačatku jaho ekspluatacyi. Ni pra jakija kankretnyja rašeńni pakul nie abvieščana. Ułady Niamieččyny padtrymlivajuć dabudovu hazapravodu.
