Arciom Šrajbman vyjechaŭ va Ukrainu paśla abvinavačvańniaŭ Pratasieviča
«Ja ciapier va Ukrainie, dabiraŭsia akolnymi ściežkami, jak dakładna — nie skažu, moža spatrebicca kamuści jašče», — skazaŭ jon «Našaj Nivie».
Arciom Šrajbman. Fota Nadziei Bužan
«Ja tut tamu, što ryzyki znachodžańnia ŭ Biełarusi vielmi ŭzraśli paśla tych abvinavačvańniaŭ, jakija prahučali ŭ intervju Pratasieviča: što nibyta ja kaardynavaŭ pratesty, raiŭ aktyvistam i kanałam, što i jak im rabić, i hetak dalej.
Ale što ja mahu skazać pa fakcie: Pratasievič vielmi pierabolšyŭ stupień majho ŭpłyvu. Tak, ja ŭ tym čacie byŭ, heta nie sakret, pra heta kazali pa ANT jašče paŭhoda tamu. Było viadoma, što ja tam, i daŭno byŭ jasny farmat čata, što tam abmiarkoŭvałasia. Daloka nie ŭsie ŭ čacie padychodziać pad apisańnie «kaardynataraŭ», tamu što samo abmierkavańnie detalaŭ akcyj i ich płaniroŭka adbyvałasia na sazvonach, u jakich ja ŭdziełu nie braŭ pryncypova, nijakich «złačynnych» detalaŭ zahadzia ja nie viedaŭ, ja, chutčej, naziraŭ za refleksijami spryčynienych udzielnikaŭ, što było cikava mnie jak analityku.
Ja nie baču ničoha takoha, što niesumiaščalna z zakonam i majoj prafiesijaj, ja atrymlivaŭ infarmacyju ad pieršakrynic. I mnie ciažka kryŭdzicca na Pratasieviča, my tolki možam hadać, jakija pierad im pastavili ŭmovy», — prakamientavaŭ Šrajbman.
A voś, što jon napisaŭ u svaim kanale pa hetaj situacyi:
«Iranična atrymałasia. Ranicaj 3 červienia vychodzić vypusk prajekta «Redakcyja», jaki zaviaršajecca maimi słovami pra toje, što ja nie adčuvaju pramoj pahrozy i tamu nie źjazdžaju ź Biełarusi, a ŭžo ŭviečary ja ŭ śpiešcy źbiraju rečy i vybirajusia z krainy.
Ja liču važnym raspavieści ab pryčynach. U intervju na ANT Raman Pratasievič skazaŭ, što ja dapamahaŭ paradami ŭ čacie, jaki možna było nazvać kaardynacyjnym štabam revalucyi, — Love Hata.
Mahu tolki zdahadvacca, čamu i ci pa svajoj voli, ale Roma pierabolšyŭ moj udzieł u pracesie. Ja sapraŭdy da vosieni 2020 hoda byŭ u hetym čacie, jaki pačynaŭsia jak prosta anłajn-schodka błohieraŭ, ale pa miery narastańnia pratestaŭ hetaja tema stanaviłasia klučavoj u abmierkavańniach.
Maja cikaŭnaść była ŭ tym, kab nazirać užyvuju, jak majuć znosiny tyja, kaho da žniŭnia stali nazyvać kaardynatarami biełaruskaj revalucyi. Daloka nie ŭsie ŭ čacie padychodzili pad heta apisańnie, dy i samo abmierkavańnie detalaŭ budučych akcyj *dla biaśpieki* adbyvałasia na sazvonach «kaardynataraŭ». Ja z tych ža samych mierkavańniaŭ biaśpieki ni ŭ adnym z takich sazvonaŭ tak i nie paŭdzielničaŭ.
Ale sprava była, viadoma, nie tolki ŭ biaśpiecy. Prabačcie za pafas, ale ŭ mianie jość daŭniaja pazicyja, što analityk nie moža i nie pavinien stanavicca ŭdzielnikam pracesaŭ, jakija analizuje, hetak ža, jak i kamientatar matču nie moža być futbalistam na poli. Mnohija ludzi krytykujuć mianie za hetaje samaŭchileńnie, ale ja prosta nie zmoh by sumlenna analizavać palityku i zajmacca joj adnačasova.
Na samaj spravie, ja nie viedaju dakładna, ci jość i ci była da mianie niejkaja asablivaja cikaŭnaść z boku biełaruskich śpiecsłužbaŭ, jakaja mahła b pryvieści da aryštu. Dachodziać čutki ab padrychtoŭcy kryminalnaj spravy, ale pakul ich składana paćvierdzić. Paradoks u tym, što pra isnavańnie čata, jaho tematyku i śpis jaho ŭdzielnikaŭ siłaviki viedali jak minimum ź siaredziny vosieni. Mianie ŭ hetym śpisie pakazali na ANT jašče ŭ śniežni, paŭhoda tamu. I ničoha.
Ja nie źjechaŭ tady, pakolki razumieŭ, što ŭvohule mnie niama čaho vystavić. Navat niahledziačy na źlityja skrynšoty pierapisak z čata i vierahodnaść taho, što ŭ śpiecsłužbaŭ jość vialiki masiŭ takich skrynoŭ, ja dakładna viedaŭ, što tam nie budzie majho «lalkavodstva», tamu što jaho i ŭ pryrodzie nie było. Tolki kali ŭ fotašopie malavać. Z majho boku nie było nijakaha kansultavańnia za miežami niejkaha bazavaha apisańnia majho bačańnia situacyi ŭ krainie, to-bok taho, što ja i tak kažu ŭ intervju i pišu ŭ artykułach.
Ale ŭ siońniašniaj Biełarusi navat niedatyčnaść da taho, što ŭłada ličyć złačynstvam, — užo niedastatkovaja strachoŭka. Pa spravie TUT.BY, farmalna źviazanamu z padatkami kampanii, siadzić palityčny błok redakcyi, ludzi, jakija peŭna navat paniaćcia nie majuć, kolki padatkaŭ jany płacili.
Z maim kiejsam takaja ž situacyja — prostaje znachodžańnie ŭ tym čacie šmat miesiacaŭ tamu i hučnyja zajavy Pratasieviča ciapier ź viadučym, jaki asobna pierapytaŭ pra mianie, — heta pierachod u zonu niekamfortnaj ryzyki. Heta pačućcio ŭmacavałasia, kali ŭ toj samy viečar ja ŭbačyŭ niešta vielmi padobnaje da nazirańnia la svajho padjezda.
Nie viedaju, ci pahražaŭ mnie aryšt. Intervju Ramana puścili ŭ efir, nie zatrymaŭšy mianie napiaredadni, choć ja nie chavaŭsia. Moža, i ciapier usio skončyłasia b, jak paŭhoda tamu, heta značyć ničym. Ale spakojna žyć i pracavać u krainie pry takich uvodnych dalej było b składana. Tamu pryjšłosia pajści na vielmi niekamfortnaje rašeńnie — źjechać. Abiedźvie alternatyvy — SIZA i štodzionnaje čakańnie SIZA — byli jašče horšyja jak dla mianie, tak i dla blizkich.
Ułasna, na hetym usio, dziakuj za ŭvahu, za pieražyvańni i mnostva prapanoŭ dapamahčy. Maja situacyi nieparaŭnalna praściejšaja, čym u tych, chto siadzić abo vymušany čakać z turmaŭ rodnych, tamu na maim miescy raskisać — hrech. Praciahvaju pracavać, jak pracavaŭ. Budu z usich siłaŭ staracca zachoŭvać svoj zvyčajny padychod da analityki, niahledziačy na sproby źlapić ź mianie niečaha kansultanta. Nie kansultavaŭ i nie źbirajusia. I da chutkaha na radzimie. Usio prachodzić.
P.S. Nijakaj kryŭdy na Pratasieviča niama i być nie moža. My nie viedajem, jaki sklep u ŁNR i jaki los dla jaho dziaŭčyny jamu abmalavali ŭ vypadku admovy ad hetaha intervju. Zakładnikaŭ nie sudziać».
