U 1990-ja ŭ niebie latali biełaruskija bieł-čyrvona-biełyja samaloty, ale nie «Biełavija». FOTA i tłumačeńni
Biełarusy pryzvyčailisia, što ajčynnaja avijacyja — heta vyklučna dziaržaŭny manapalist «Biełavija». Ale tak było nie zaŭsiody. U 1990-ja ŭźnikła adrazu niekalki pryvatnych avijakampanij. Siarod ich — «Biełejr».
Naohuł, u śviecie viedajuć inšuju kampaniju z takoj nazvaj. Havorka pra šviejcarskuju kampaniju Belair Airlines AG (ścisła Belair), jakaja ŭźnikła amal sto hadoŭ tamu i spyniła isnavańnie ŭ 2017-m.
Biełaruskaja kampanija, što «pazyčyła» ich nazvu, źjaviłasia ŭ pieršy hod paśla abviaščeńnia niezaležnaści — u siaredzinie 1992-ha — i stała pieršym kankurentam ciapierašniaj «Biełavii». Jaje zasnavalnikam staŭ biznesmien Jaŭhien Kuźmin.
Belair, što baziravałasia ŭ aeraporcie «Minsk-2», śpiecyjalizavałasia na čartarnych rejsach — i pasažyrskich, i hruzavych. Jana mieła samaloty troch typaŭ — dva hruzavyja Ił-76, dva Tu-134 i adzin Jak-40.
Admietnaściu kampanii staŭ bieł-čyrvona-bieły koler samalotaŭ z elemientami nacyjanalnych uzoraŭ.
Iły vykarystoŭvalisia ŭ apieracyjach AAN u Juhasłavii, dzie ŭ 1990-ja išła hramadzianskaja vajna. Adzin z hetych samalotaŭ byŭ paškodžany ŭ Sarajevie pry pasadcy: mielisia prablemy z nasavoj častkaj i piaredniaj častkaj šasi. Ale zonu, kudy trapiŭ samalot, abstrelvali sierbskija snajpiery, tamu Ił vyrašyli nie evakuiravać i nie adnaŭlać. U pačatku nastupnaha dziesiacihodździa jaho ŭtylizavali.
Situacyja ŭ Sarajevie admoŭna paŭpłyvała na biznes. Ale toje byŭ nie hałoŭny faktar. Avijapieravozki tady byli nie tak zapatrabavanyja ŭ nasielnictva, jak ciapier. Dy i biełarusy nie byli nadta bahatymi. Svaju rolu adyhrała i staŭka dziaržavy na «Biełavija».
U 1999-m kampanija spyniła isnavańnie, a Kuźmin pierajšoŭ na pracu ŭ «Biełavija».
