Pamior śviatar, daśledčyk represij suprać duchavienstva Fiodar Kryvanos
1 červienia pamior pravasłaŭny śviatar, protaijerej Fiodar Kryvanos.
Fiodar Kryvanos naradziŭsia 18 žniŭnia 1962 hoda. Skončyŭ histfak BDU (1985). Chryściŭsia ŭžo ŭ darosłym uzroście, u 1987 hodzie, u chramie śviatoha Alaksandra Nieŭskaha ŭ Minsku. U 1994-m uładykam Fiłaretam byŭ paśviačony ŭ dyjakana, a paśla i ŭ śviatara, piša church.by.
Church.by
Skončyŭ Minskuju duchoŭnuju sieminaryju (2001), Minskuju duchoŭnuju akademiju (2007), šmat hadoŭ addaŭ vykładańniu ŭ minskich duchoŭnych škołach.
Słužyŭ u Śviata-Duchavym kafiedralnym sabory. Byŭ adkazny za rabotu niadzielnych škoł u prychodach Minskaj jeparchii, pracu ŭ Vydavieckim saviecie Biełaruskaj Pravasłaŭnaj Carkvy, byŭ členam Sinadalnaj kamisii pa kananizacyi śviatych Biełaruskaj Pravasłaŭnaj Carkvy.
Apošnija hady chvareŭ, tamu byŭ vyviedzieny pa-za štat. Adnak nie pakidaŭ aśvietnickaj dziejnaści: rehularna pisaŭ i publikavaŭ artykuły pa historyi Biełaruskaj Pravasłaŭnaj Carkvy.
Usie svaje nabytyja na histfaku BDU kampietencyi ajciec Fiodar Kryvanos pastaviŭ na słužbu Pravasłaŭnaj carkvy.
«Mienavita dziakujučy pracam ajca Fiodara prasłaŭlenyja navamučaniki i padźvižniki relihijnaści Biełarusi XX stahodździa», — padkreślivaje church.by.
Jon zajmaŭsia daśledavańniem represij suprać duchavienstva ŭ XX st.
«Ajciec Fiodar — unikalny čałaviek. Jahony pakoj na Tałbuchina — skarb. Rukapisy, redkija fota ludziej, jakich mała chto pamiataje. Śviataroŭ. Jon viarnuŭ da žyćcia imiony tysiačy zahublenych žyćciaŭ. Z błasłavieńnia mitrapalita Fiłareta pracavaŭ u archivach HB, prapuskaŭ praź siabie žachlivyja historyi katavańniaŭ, jakija čynili nieludzi-balšaviki. Usio praź siabie» — napisała ŭ svaim fejsbuku Volha Babkova
Fota z fejsbuka Taćciany Kuźniacovaj
