U Brytanii zrabili mabilny dadatak, jaki za piać chvilin vyjaŭlaje sindrom Alchiejmiera
Miedyki ličać, što na bazie jaho možna zapuścić masavuju prahramu rańniaha vyjaŭleńnia demiencyi.
Brytanskaja nacyjanalnaja słužba achovy zdaroŭja prezientavała navatarski mabilny dadatak, jaki pry dapamozie štučnaha intelektu dapamahaje vyjavić sindrom Alchiejmiera. Prahramie treba ŭsiaho piać chvilin, kab adkazać na pytańnie, ci maje čałaviek chvarobu.
Kab zrabić vysnovy pra toje, jak funkcyjanuje mozh čałavieka, dadatak demanstruje na ekranie vialikuju kolkaść čorna-biełych fota. Pacyjent, u svaju čarhu, pavinien adkazać, ci jość na fota vyjava žyvioły. Fota źjaŭlajucca na ekranie tolki na dolu siekundy. Na niekatorych ź ich jaŭna vidać žyvioła, na inšych jaje znajści bolš ciažka abo jaje tam uvohule niama, piša inews.co.uk.
Takoje daśledavańnie moža vyjavić takija źmianieńni ŭ chutkaści reakcyi čałavieka i ŭ jaho zdolnaści bačyć drobiazi, jakija prajaŭlajucca chutčej za stratu pamiaci, ź jakoj pracujuć zvyčajnyja testy dla vyjaŭleńnia sindromu Alchiejmiera. Tamu ličycca, što vyniki pracy dadatku bolš dakładnyja za hetyja testy.
Što datyčyć žyvioł, hetuju temu vybrali dla dadatku, tamu što žyvioły vyklikajuć u ludziej mocnuju reakcyju i heta stvaraje lepšyja ŭmovy dla analizu mazhavoj aktyŭnaści. Stvaralniki prahramy, kampanija Cognetivity, admovilisia ad kalarovych fota, kab test dobra pracavaŭ i ŭ vypadku z pacyjentami-daltonikami, a taksama tamu, kab kolery nie słužyli dla pacyjentaŭ dadatkovaj padkazkaj.
Pakul što prahrama pracuje na iPad, u Brytanii test robiać na pryjomie ŭ terapieŭta abo ŭ pałacie špitala. Ale chutka dadatak mohuć adaptavać dla smartfona.
