«U RUUSie skazali, što mianie pasadziać za toje, što ja vyhadavała takuju dačku». 56-hadovuju Taćcianu Michajłavu aryštavali na 15 sutak
13 maja stała viadoma, što dadomu da 56-hadovaj Taćciany Michajłavaj znoŭ pryjšli supracoŭniki milicyi. Jaje zatrymali za ŭskładańnie kvietak kala Kamaroŭskaha rynku, ale žančyna heta admaŭlaje.
Biełsat
Paśla zatrymańnia Michajłavu dastavili ŭ Savieckaje RUUS i skłali pratakoł pa art. 24.23 KaAP — niesankcyjanavanaje pikietavańnie. U pratakole paznačyli, što 12 traŭnia na vulicy V. Charužaj Taćciana «pryniała aktyŭny ŭdzieł u pikietavańni, uskłaŭšy kvietki na placoŭcy la centralnaha ŭvachodu ŭ Kamaroŭski rynak», paviedamlajuć pravaabaroncy.
Žančyna śćviardžaje, što ŭ hety čas jana była ŭ siabie doma i ŭdziełu ŭ pikietavańni nie prymała. Tamu sudździa Siarhiej Šaciła pacikaviŭsia, u suviazi z čym na jaje tady skłali pratakoł. Taćciana vykazała zdahadku, što heta moža być źviazana ź jaje dačkoj:
— U krasaviku da nas pryjazdžali supracoŭniki milicyi i šukali maju dačku, jakaja nibyta ŭdzielničała ŭ «prahułcy z parasonami». Jaje nie znajšli, tamu prapanavali mnie prajechać ź imi, a ŭžo ŭ Centralnym RUUS mnie skazali, što mianie pasadziać za toje, što ja vyhadavała takuju dačku. Ale joj užo 30 hadoŭ, jana darosły čałaviek i samastojna prymaje rašeńni. Pratakoł mnie tady nie pakazali, što stavicca ŭ vinu nie kazali. I tolki na sudzie ja daviedałasia, što mianie abvinavačvajuć u niepadparadkavańni, kali ja išła ad doma da mašyny: byccam ja čaplałasia i ŭpirałasia. [Jaje tady aryštavali na 5 sutak, paviedamlaŭ Biełsat.] Heta niapraŭda, ale ciapier heta ŭsio roŭna, tak? I ciapier ja dumaju, što jany pryjechali da mianie dadomu, bo ja ŭžo dzieści zaśviaciłasia. Pytalisia, dzie Jula, ale jaje nie było, tamu mnie prapanavali prajechać ź imi, paviedamlajuć pravaabaroncy.
Na sud źjaviŭsia śviedka-milicyjant «Bielski», jaki ŭ hety momant znachodziŭsia pobač z zatrymanaj u IČU. Pavodle jaho słovaŭ, jon asabista naziraŭ, jak žančyny ŭ biełym uskłali kvietki, paśla čaho spuścilisia ŭ pierachod i źniali maski i chustki — tak jon i apaznaŭ Taćcianu. Jon rastłumačyŭ, što zmoh zapomnić tvary siami ź dziesiaci žančyn, na što advakat spytaŭ, ci majecca ŭ jaho paśviedčańnie ab zvyšnaturalnych zdolnaściach. «Bielski» adkazaŭ, što jon zvyčajny čałaviek.
Muž Taćciany taksama paćvierdziŭ sudu, što jana ŭvieś dzień praviała ŭ aharodzie i nikudy nie sychodziła.
U pratakole było šmat pamyłak, jakija nie vypravili navat paśla dapracoŭki. U spravie adsutničali dokazy viny, niepasrednaha ŭdziełu Taćciany ŭ pikietavańni i navat jaje faktyčnaha znachodžańnia ŭ Minsku. Ale 15 traŭnia sudździa Šaciła nie źviarnuŭ na heta ŭvahu i aryštavaŭ Taćcianu Michajłavu na 15 sutak.
