Ekołahi prapanujuć zrabić Prypiackaje Paleśsie abjektam Suśvietnaj pryrodnaj spadčyny JUNIESKA
«Jość płany nadać Paleśsiu status abjekta Suśvietnaj pryrodnaj spadčyny JUNIESKA i bijaśfiernaha reziervata JUNIESKA», — paviedamiŭ kaardynatar prahram Frankfurckaha zaałahičnaha tavarystva ŭ Biełarusi, śpiecyjalist APB pa pryrodaachoŭnych pytańniach Viktar Fiančuk na niadaŭnim kruhłym stale ŭ Minsku.
Na siońnia ŭ krainie tolki Biełaviežskaja pušča sumiaščaje abodva hetyja statusy. Bijaśfiernymi reziervatami na ŭzroŭni AAN pryznany jašče dźvie terytoryi — Biarezinski zapaviednik i Prybužskaje Paleśsie.
Čakajecca, što novy abjekt JUNIESKA budzie transhraničny, zakranie i biełaruskija, i ŭkrainskija terytoryi. Jadrom vystupić nacyjanalny bijaśfierny reziervat «Prypiackaje Paleśsie», stvorany ŭ 2016 hodzie ŭ miežach troch biełaruskich asabliva achoŭnych pryrodnych terytoryj — zakaźnikaŭ «Almanskija bałoty», «Stary žadzien» i Nacparku «Prypiacki».
Ideja padtrymanaja ŭ Minpryrody. Ciapier APB pavodle prajekta «Paleśsie — dzikaja pryroda bieź miežaŭ» rychtuje papiaredniuju zajaŭku, jakaja pavinna być pieradadziena ŭ JUNIESKA da 1 lutaha 2022 hoda. Zatym, zhodna z płanami, pačniecca padrychtoŭka asnoŭnaj zajaŭki.
Śpiecyjalisty spadziajucca, što mižnarodnaje pryznańnie dapamoža zachavać unikalny pryrodny kompleks, paspryjaje stanaŭleńniu turyzmu i ŭ cełym stanie faktaram ustojlivaha raźvićcia rehijonu.
