Ukrainskija śpiecsłužby vysyłajuć z krainy biełaruskaha anarchista
Supracoŭniki Nacyjanalnaj palicyi i Słužby biaśpieki Ŭkrainy ranicaj 21 krasavika praviali vobšuk u kijeŭskaj kvatery, dzie pražyvaje biełaruski anarchist Alaksiej Balankoŭ, i papiaredzili jaho ab prymusovym vydvareńni z ukrainskaj terytoryi, paviedamlaje «Radyjo Svaboda».
«Alaksiej patelefanavaŭ mnie siońnia ranicaj. U jaho palicyja praviała pieratrus na padstavie sudovaha rašeńnia. Było ŭsio karektna — z paniatymi, pratakołami… Ja tak razumieju, što ničoha vartaha ŭvahi nie znajšli. Ale razam z tym da jaho pryjšli i supracoŭniki SBU, z departamentu abarony nacyjanalnaj dziaržaŭnaści z rašeńniem ab prymusovym vydvareńni z Ukrainy», — paviedamiŭ «Svabodzie» kaardynatar hramadzkaj arhanizacyi «Biaź miežaŭ» Maksim Butkievič.
Siabry Alaksieja Balankova raskazvajuć, što toj źjechaŭ va Ŭkrainu ŭ 2017 hodzie paśla taho, jak u Biełarusi jaho abvinavacili ŭ sprobie padpalić padatkovuju ŭ Homli, a potym sprabavali «zaverbavać» na supracu, a kali jon admoviŭsia, pačali kryminalny pieraśled. Va Ŭkrainie jon žyŭ na padstavie dazvołu na časovaje pražyvańnie.
U pravaachoŭnych orhanach «Svabodzie» paćvierdzili fakt praviadzieńnia pieratrusu i zatrymańnia Alaksieja Balankova, ale admovilisia ŭdakładnić, u jakuju krainu jaho źbirajucca vyvozić. Surazmoŭca «Svabody» paviedamiŭ, što ciaham dnia budzie apublikavany aficyjny kamentar ab hetaj sytuacyi.
U svaju čarhu Maksim Butkievič padkreśliŭ, što na padstavie sudovaha rašeńnia adbyvaŭsia tolki pieratrus, a departacyju abiacajuć ažyćciavić na padstavie pratakołu SBU, što źjaŭlajecca niezakonnym.
Sam Alaksiej paśpieŭ paviedamić «Svabodzie», što vobšuk u jaho pravodzili praź «niejkaje padazreńnie va ŭčynieńni padpałaŭ», a SBU paviedamiła ab nieabchodnaści pakinuć terytoryju Ŭkrainy ŭ metach «nacyjanalnaj biaśpieki dziaržavy».
«Miarkuju, što heta zakazali ŭltrapravyja hrupoŭki Ŭkrainy, pakolki ja zajmajusia achovaj roznych akcyj, jakija pravodziać, u tym liku, ŁHBT. I pakolki ŭ nas byli sutyknieńni, napady na mianie… Jany ŭžo navat viedajuć, što ŭ mianie prachodzić vobšuk, chacia nijakaj aficyjnaj infarmacyi pra heta jašče nidzie nie było», — skazaŭ Alaksiej.
Pavodle Alaksieja, da jaho paśpieła pryjechać jahonaja advakatka. «Niejkija padpały, u jakich nibyta padazrajuć anarchistaŭ, — heta tolki nahoda, bo ja taksama anarchist. Za mnoj užo paŭhoda sačyli, i palicyja bačyła, što ja pracuju (zajmajusia pašyvam adzieńnia) i časam udzielničaju ŭ achoŭnych mierapryjemstvach. Nijakimi padpałami ja nie zajmajusia, jany vykarystali heta jak nahodu, kab pryjści da mianie i pravieści pieratrus», — dadaŭ Alaksiej Balankoŭ.
«Mnie paviedamili, što ja pahražaju nacyjanalnaj biaśpiecy Ŭkrainy, tamu ŭchvalili rašeńnie ab tym, kab ja pakinuŭ terytoryju Ŭkrainy ciaham 24 hadzin. Jany chacieli mianie vyciahnuć z kvatery, ale pryjechaŭ advakat i skazaŭ, što jany nia majuć prava. Supracoŭniki SBU nia majuć prava znachodzicca ŭ majoj kvatery, jany navat nie pakazali nam svaje paśviedčańni», — dadaŭ Alaksiej Balankoŭ.
U červienia 2019 hodu pavodle analahičnaha scenaru z Ukrainy departavali ŭ Biełaruś jašče adnaho anarchista, byłoha palitviaźnia Alaksandra Franckieviča.
