Cichanoŭskaja razam z ambasadarami Litvy, Polščy, ZŠA naviedali «Bazyljanskija mury» ŭ Vilni
Śviatłana Cichanoŭskaja razam z pasłami Litvy, Polščy, ZŠA, a taksama vice-ministram zamiežnych spraŭ Litvy Mantasam Adamienasam naviedali «Bazyljanskija mury», paviedamlaje jaje pres-słužba
«Bazyljanskija mury» — heta byŭ intelektualny centr, a taksama samy bujny biełaruski asiarodak u Vilni ŭ mižvajenny pieryjad. Mienavita tut mieścilisia Vilenskaja biełaruskaja himnazija i Biełaruski muziej.
Cichanoŭskaja i pasły taksama zajšli ŭ hreka-katalickuju Śviata-Troickuju carkvu i naviedali kiellu Konrada, taksama viadomuju jak kiellu Adama Mickieviča, dzie Adam Mickievič u pačatku 1820-ch znachodziŭsia ŭ viaźni, čakajučy svajho sudziebnaha prysudu pa spravie fiłamataŭ i fiłaretaŭ. Tam jon siadzieŭ z vybitnym biełaruska-polska-litoŭskim dziejačom Ihnacijem Damiejkam.
Cichanoŭskaja adznačyła: «Mickieviču tady było ŭsiaho 25 hadoŭ. I, zachodziačy ŭ kiellu, ja dumała pra dziaŭčatak i chłopcaŭ, jakija ŭ hety momant siadziać u ciesnych i ciomnych kamierach. Sotni biełarusaŭ znachodziacca ŭ turmie pa palityčnych matyvach, i ŭsie jany — našy sučasnyja hieroi. My pavinny zrabić usio, kab vyzvalić i reabilitavać ich».
Cichanoŭskaja z pasłami ŭskłali kvietki na ŭvachodzie ŭ biełaruskuju himnaziju, jakaja znachodziłasia tut u pačatku XX st., pierad šyldami kłasikam biełaruskaj litaratury Maksimu Hareckamu i Natalli Arsieńnievaj.
Potym dypłamaty zapalili śviečki pierad abrazom Maci Božaj Astrabramskaj, jakuju šanujuć i kataliki, i pravasłaŭnyja.