Na čale Hiermanii ŭpieršyniu mohuć ustać «Zialonyja» i ich maładaja lidarka
Partyja vyłučyła na pasadu kanclera 40-hadovuju Analenu Bierbok.
19 krasavika partyja «Sajuz-90»/»Zialonyja» paviedamiła, što 40-hadovaja Analena Bierbak (Annalena Baerbock) stanie kandydatkaj na post kiraŭnika ŭrada, vybary jakoha adbuducca sioleta ŭ vieraśni. Mienavita Bierbak ciapier maje niadrennyja šancy stać novym kancleram Hiermanii. Pa źviestkach apytańniaŭ, partyja stabilna zajmaje druhoje miesca i sastupaje tolki kansiervataram na 4-5%.
Partyju «zialonych» u Hiermanii ŭznačalvajuć Analena Bierbak i Robiert Chabiek (Robert Habeck) z 2018 hoda. Za čas ichniaha kiravańnia rejtynh partyi pavialičyŭsia ŭ dva z pałovaj razy — z 8,9% pracenta na vybarach u bundestah u 2017 hodzie da 22-23% u krasaviku 2021. Ciapier «zialonyja» prysutničajuć amal va ŭsich miascovych parłamientach.
Analena Bierbak naradziłasia ŭ 1980 hodzie ŭ nievialikim miastečku kala Hanoviera, stalicy Nižniaj Saksonii. U junactvie jana prafiesijna zajmałasia sportam i trojčy zavajoŭvała bronzu na nacyjanalnych spabornictvach pa skačkach na batucie, piša Deutsche Welle.
U 16-hadovym uzroście Bierbak hod žyła ŭ ZŠA ŭ miežach školnaha abmienu, a ŭniviersiteckuju adukacyju atrymała ŭ Hamburhu, dzie kandydatka vyvučała palitałohiju i prava. Zatym Bierbak atrymała dypłom mahistra mižnarodnaha prava ŭ Łondanskaj škole ekanomiki.
Na pačatku karjery Bierbak pracavała pazaštatnym supracoŭnikam hanovierskaj haziety, a potym uznačalvała ŭ Bruseli ofis deputata Jeŭraparłamienta.
U 2005 hodzie Analena Bierbak ustupiła ŭ partyju «zialonych», dzie zajmałasia jeŭrapiejskaj palitykaj, a paźniej uznačaliła ziamielnaje adździaleńnie «zialonych» u Brandenburhu, dzie jana žyvie razam z mužam i dźviuma dočkami.
Z 2013 hoda Bierbak — deputat bundestaha. Jana kuryruje palityku, źviazanuju sa źmienami klimatu, a taksama pytańni ŭschodnich ziamiel Hiermanii.
Baraćba sa źmienami klimatu — adna z centralnych tem dla Bierbak. Viadoma, što jana vystupaje za paskareńnie tempaŭ admovy ad vuhalnaj enierhietyki, jakuju ŭ Hiermanii zapłanavali na 2038 hod.
U źniešniaj palitycy Bierbak maje reputacyju žorstkaha krytyka dziejańniaŭ Rasii va Ukrainie. Da taho ž, kandydatka vystupaje suprać zaviaršeńnia budaŭnictva hazapravoda «Paŭnočny patok — 2», bo, na jaje dumku, hety prajekt supiarečyć jeŭrapiejskim metam pa baraćbie z klimatyčnym kryzisam i ŭsim sankcyjam ES suprać Rasii. Bolš za toje, hazapravod pieraškadžaje hieastratehičnym intaresam jeŭrapiejcaŭ i maje vyraznuju nakiravanaść suprać Ukrainy.
