Razhromleny daišnikami aŭtamabil pradali na aŭkcyjonie, pakul ułaśnik atrymaŭ dva hady kałonii FOTA
Adbyŭsia aŭkcyjon, na jakim pradali Aŭdzi A4 u žudasnym stanie. Raźbitaje ŭvohule ŭsio škło, złamanyja lusterki, dzirki u kapocie, razarvanaja šyna. Cana prodažu — 6410 rubloŭ pry startavaj canie 4237 rubloŭ. Što ž adbyłosia z mašynaj?
Jak akazałasia, heta taja samaja mašyna, jakuju ŭ žniŭni pieraśledavali adrazu 8 ekipažaŭ DAI. Jany chacieli zatrymać kiroŭcu, a taki vyhlad mašyna nabyła paśla skančeńnia pahoni.
«Byŭ śviedkam pahoni za Aŭdzi 12 žniŭnia. Heta adbyłosia na źniešnim baku MKAD u rajonie źjezda ad Šaranhoviča da Jeŭraopta na Mantažnikaŭ. Ja ruchaŭsia pa ŭnutranym kalcy i, zaŭvažyŭšy z supraćlehłaha boku mnostva majačkoŭ, skinuŭ chutkaść. Bačyŭ, jak natoŭp ludziej u błakitnych kašulach źniščaje aŭtamabil. Pry hetym niekalki ekipažaŭ stajali na ŭnutranym kalcy, jany pierałazili cieraz płot i dałučalisia. Kali advioz baćku z raboty i viartaŭsia, to jechać nazad było strašna — u tym ža miescy, aproč hramadzianskaj Aŭdzi, stajała jašče niekalki mašyn, na travie lažali ludzi z rukami za śpinaj, na Aŭdzi ŭžo nie było žyvoha miesca», — napisaŭ u «Našu Nivu» adzin sa śviedkaŭ zdareńnia.
Ale na infarmacyjnych resursach infarmacyi ab tym, što adbyłosia ŭ toj viečar 12 žniŭnia, niama.
Jak my vyśvietlili, hetaja mašyna naležała 20-hadovamu minčuku, studentu-treciakurśniku.
Sprava była takoj: 12 žniŭnia jon pajechaŭ zabirać maci z raboty, a na advarotnym šlachu vyrašyŭ pakatacca pa rajonie i pahladzieć, što adbyvajecca ŭ horadzie. Pry hetym u jahonym bahažniku, jak śćviardžała abvinavačvańnie, lažali butelki ź bienzinam, jakija jon «chacieŭ pieradać pratestoŭcam».
Spałochaŭšysia niejkich ruchaŭ AMAPa, jon pačaŭ źjazdžać, ale pryciahnuŭ uvahu DAI. Student nie staŭ spyniacca, pačałasia pahonia.
U vyniku jamu prastrelili koły i zatrymali razam z maci, razhramiŭšy mašynu.
Sud Zavodskaha rajona ŭžo prysudziŭ chłopca da 2 hadoŭ kałonii. Abvinavačvańni z mamy źniali — maŭlaŭ, jana nie viedała pra toje, što ŭ bahažniku.