Navukoŭcy stvaryli «samuju biełuju farbu» — jana moža astudžać damy lepš za kandycyjaniery
Farba, stvoranaja ŭ ZŠA, adlustroŭvaje 98% soniečnaha śviatła.
Siuliń Čžuań z uzoram «samaj biełaj farby». Fota The Guardian.
Vykarystańnie takoj farby dazvolić nie nahravacca budynkam u śpiakotnym klimacie i źnizić vydatki na kandycyjaniery, piša The Guardian.
Bolš za toje, novaja farba adlustroŭvaje infračyrvonyja chvali na daŭžyni, jakaja nie pahłynajecca atmaśfieraj. Tamu jany viartajucca nazad u kosmas i nie nahravajuć navakolnaje asiarodździe, što moža dapamahčy ŭ baraćbie z klimatyčnym kryzisam.
Dachi biełaha koleru ŭžo daŭno vykarystoŭvajucca dla achałodžvańnia budynkaŭ. Adnak sučasnyja biełyja farby pahłynajuć tolki 80-90% soniečnaha śviatła i pahłynajuć ultrafijaletavyja promni. Heta značyć, što jany nie mohuć astudzić pavierchni nižej za tempieraturu na dvare. Padčas vyprabavańniaŭ «samaja biełaja farba» astudžała pavierchni na 4,5° S nižej za tempieraturu navakolnaha asiarodździa.
U vyniku pakryćcio novaj farbaj 100 kvadratnych mietraŭ dachu daje achaładžalnuju mahutnaść 11,7 kiłavat. Jak padkreślivaje aŭtar daśledavańnia Siuliń Čžuań, heta bolš, čym majuć sučasnyja kandycyjaniery.
Daśledčyki ŭžo patentujuć farbu i płanujuć, što jana źjavicca na rynku praz hod-druhi. Jaje cana nie budzie značna adroźnivacca ad anałahaŭ.
