U Pinsku kala 50 rabočych sabralisia ŭ zakrytaj kramie «Viasiołka», patrabujučy vypłaty zarobku
Krama «Viasiołka» na vulicy Bresckaj u Pinsku zakryłasia 6 krasavika. Za tydzień da hetaha administracyja sabrała rabotnikaŭ i paviedamiła, što ich handlovy abjekt pierachodzić da «Santa-rytejł». Pra heta Tut.by raspaviała pradaviec Maryja, jakaja vychoŭvaje piaciarych dziaciej.
— Sabrali i skazali, što nas «Santa» vykupiła. My chadzili na pracu, jak zvyčajna, bo nam kazali, maŭlaŭ, «my nie viedajem, kali zakryjemsia». 5 krasavika my vyjšli na pracu, jak u zvyčajny pracoŭny dzień — i nam skazali, što siońnia pracujem apošni pracoŭny dzień, z zaŭtrašniaha dnia zakryvajemsia, — patłumačyła Maryja. — Ale nas tak i nie raźličyli. Užo treci dzień čakajem zarpłaty za sakavik. U kancy miesiaca atrymali tolki avans.
— Handlovy dom «Viasiołka» zakryŭsia, a nas pra heta nie papiaredzili zahadzia — raspavioŭ abvalščyk Michaił, jaki ciapier znachodzicca z kalehami ŭ kramie na Bresckaj. — Nas prosta 5-ha pastavili pierad faktam, što 6 krasavika — apošni pracoŭny dzień. Skazali zvalniacca pa ŭłasnym žadańni ź pieravodam u «Santu». «Santa» hatova ŭziać da siabie ŭsich rabotnikaŭ. Ludzi spytali:
«A što nam rabić dva miesiacy, pakul budzie pieraabstaloŭvacca naša krama na Bresckaj?» Im prapanavali sychodzić za svoj košt. A ŭ mnohich kredyty.
16 krasavika rabotnikaŭ zaprasili na sustreču ŭ zakrytuju kramu:
— Skazali siońnia da 9.00 pryjści. My pryjšli — skazali pisać zajavy pa ŭłasnym žadańni. My admovilisia, — kaža Maryja.
Rabotniki «Viasiołki» vyrašyli nie razychodzicca — i da hetaha času ŭžo kala čatyroch hadzin zastajucca ŭ pamiaškańni kramy.
— Ludzi chočuć zvolnicca z kampiensacyjaj — u pamiery troch siarednich zarobkaŭ. Nie ź pieraraźlikam niavykarystanaha adpačynku, jak nam kažuć, a z kampiensacyjaj. Ale nam administracyja prapanavała zvolnicca tolki pa pahadnieńni bakoŭ, — patłumačyŭ Michaił.
Rabotniki skłali kalektyŭny zvarot u inśpiekcyju achovy pracy.
«Nam 14 krasavika nie była vypłačana zarpłata, a taksama niesvoječasova vypłačvałasia zarpłata ŭ papiarednija miesiacy. Taksama my nie byli apavieščanyja ab tym, što krama «Viasiołka» pa adrasie Pinsk, vulica Bieraściejskaja, 37 zakryvajecca i my zastajomsia ŭsim kalektyvam na vulicy», — napisali jany ŭ svaim liście z patrabavańniem pravieści pravierku.
Da rabotnikaŭ siońnia ŭžo pryjazdžali rabotniki Pinskaha harvykankama i pradstaŭnik «Santa-rytejł».
— My patłumačyli pradstaŭniku «Santy», što da rytejlera ŭ nas niama nijakich pytańniaŭ. Usie rady pierajści da ich pracavać. Pytańni zastalisia da «Viasiołki, — kaža Michaił.
Raniej «Viasiołka» paviedamlała pra toje, što da 20 krasavika zakryje 12 svaich handlovych abjektaŭ u Salihorsku, Słucku i inšych haradach Biełarusi. Na ich miesca pryjduć «Santa rytejł» i «Jeŭraopt».
