U piatnicu pačniecca sud nad Cimam Biełaruskich, jakoha vinavaciać u nabyćci, užyvańni i zachoŭvańni narkotyku
Sud Maskoŭskaha rajona Minska 16 krasavika pačnie sudovy razhlad pa kryminalnaj spravie Cimy Biełaruskich, paviedamiła na svajoj staroncy ŭ fejsbuku pres-sakratarka Viarchoŭnaha suda Julija Laskova.
Cimafiej Marozaŭ (heta jaho sapraŭdnaje proźvišča) abvinavačvajecca ŭ nabyćci, užyvańni i zachoŭvańni amfietaminu masaj 0,0375 hrama, a taksama ŭ nabyćci hašyšu masaj 1,9609 hrama, jaho ŭžyvańni sumiesna z abvinavačanym Kryvieckim, a taksama jaho pieravozcy i zachoŭvańni.
«Dopusk u zału sudovaha pasiadžeńnia ažyćciaŭlajecca z ulikam supraćepidemijałahičnych mier», — dadała Laskova.
Pra vypadak stała viadoma ŭ studzieni. 6 studzienia ŭ hulniavym kłubie ŭ Minsku milicyja zatrymała Cimu Biełaruskich, pry asabistym vobšuku ŭ jakoha byŭ vyjaŭleny hašyš i amfietamin.
Zhodna z materyjałami spravy, narkotyki muzyka i jaho pryjaciel kupili praź internet. Častku narkotyku ŭžyli ŭ pamiaškańni hulniavoha kłuba, reštki vyjavili supracoŭniki milicyi. Padčas asabistaha pieratrusu śpievaka byŭ znojdzieny taksama psichatrop.
Svaju vinu abvinavačanyja pryznali ŭ poŭnym abjomie. Cima byŭ adpuščany pad zakład, jaho tavaryš znachodzicca pad vartaj.
