«Nie chacieła abrazić staršyniu CVK, nie mieła jaje na ŭvazie». Minčanku sudziać za paviedamleńnie pra Jarmošynu ŭ rajonnym čacie
Alaŭcina Korčyk pracuje techničnym piśmieńnikam, rychtuje napaŭnieńnie dla mabilnych dadatkaŭ. U pačatku 2021 hoda jaje zatrymali apieratyŭniki HUBAZiK, jakija znajšli ŭ adnym z rajonnych čataŭ paviedamleńnie z abraźlivym źmiestam na adras Jarmošynaj. Pravaachoŭniki paličyli, što ŭ dačynieńni da staršyni CVK ździejśniena złačynstva. Adnak sama Alaŭcina kaža, što nie mieła na ŭvazie nikoha kankretnaha i nie chacieła abražać čynoŭnicu.
Pavodle abvinavačvańnia, Alaŭcina Korčyk pakinuła paviedamleńnie, jakoje padryvaje aŭtarytet Lidzii Jarmošynaj i pradstaŭnikoŭ ułady. Kamientar minčanki, pa mierkavańni śledstva, parušaje ahulnyja normy marali. Takim čynam, dziaŭčynu abvinavačvajuć u publičnaj abrazie pradstaŭnika ŭłady ŭ suviazi z zajmanaj pasadaj (art.369 KK, pahražaje da 3 hod «chimii»).
Alaŭcina zajaviła ŭ sudzie, što viny nie pryznaje. Pryhadała, što ŭ kastryčniku 2020 hoda chtości pakinuŭ u rajonnym čacie videa parnahrafičnaha charaktaru. Heta jaje aburyła, pakolki padobnym čynam raniej šantažavali jaje blizkaha čałavieka, taksama niechta z karystalnikaŭ abraziŭ dziaŭčynu na videa, tamu Alaŭcina vyrašyła vykazać svajo mierkavańnie. Jaje kamientar hučaŭ tak: «Bolšaj š., čym Jarmošyna, nikomu nie stać usio adno». Siońnia ŭ sudzie dziaŭčyna kaža, što napisała proźvišča, jakoje pieršaje pryjšło joj u hałavu, nikoha kankretnaha, a tym bolš staršyniu CVK, jana nie mieła na ŭvazie. Kaža, što tolki pry pradjaŭleńni abvinavačvańnia daviedałasia, chto ŭznačalvaje Centrvybarkam.
U materyjałach spravy fihuruje linhvistyčnaja ekśpiertyza, pavodle jakoj niemahčyma adnaznačna śćviardžać, što niehatyŭny kamientar nakiravany ŭ bok staršyni CVK Lidzii Jarmošynaj. Advakat i abvinavačanaja nastojvajuć, kab ekśpierta vyklikali ŭ sud, pakolki jaje vysnovy padčas papiaredniaha śledstva nie byli naležnym čynam uličanyja.
Sama Jarmošyna ŭ sud nie źjaviłasia, ź jakoj pryčyny — nieviadoma, adnak ni prakuror, ni abaronca na stali nastojvać ab jaje dadatkovym vykliku. Źviestak pra toje, što staršynia CVK sama źviarnułasia ŭ pravaachoŭčyja orhany, niama. U materyjałach spravy jość pakazańni apieratyŭnika adździeła pa baraćbie z ekanamičnymi złačynstvami, jaki patłumačyŭ, što pa ŭkazańni načalstva manitoryŭ čaty Maskoŭskaha rajona, kab vyjavić padazronyja paviedamleńni. Tak milicyjaniery i vyjšli na Alaŭcinu.
U sudzie začytali jaje pieršyja pakazańni paśla zatrymańnia. Tam dziaŭčyna pryznaje vinu. Čamu ž zaraz inšaja pazicyja? Pa słovach abvinavačanaj, jana pryznavała vinu pad ciskam pravaachoŭnikaŭ, joj abiacali, kali ŭsio padpiša, adpuściać dadomu, a nie — dyk paviazuć na Akreścina, čaho Alaŭcina bajałasia. Ale ŭ vyniku jana padpisała pratakoł, paśla čaho jaje pavieźli ŭ izalatar. Nakont niezakonnych mietadaŭ śledstva advakat, pa jaje słovach, źviartałasia i da pradstaŭnikoŭ SK, i prakuratury, adnak składu złačynstva ŭ dziejańniach supracoŭnikaŭ nie vyjavili.
Prakuror ličyć, što vina Alaŭciny Korčyk dakazanaja i prosić pakarać jaje 2 hadami chatniaj chimii. Varta adznačyć, što dziaŭčyna raniej nie pryciahvałasia ni da administratyŭnaj, ni da kryminalnaj adkaznaści.
