Prodažy novych aŭto ŭ Biełarusi źnizilisia na 43,5%. Ekśpierty źviazvajuć trend z padzieńniem dachodaŭ
Pavodle źviestak Biełaruskaj aŭtamabilnaj asacyjacyi (BAA) za pieršy kvartał aŭtadylery pradali 9057 novych aŭto. Hod tamu hety pakazčyk pieravyšaŭ 16 tysiač. Prodažy abvalilisia na 43,5%. Za ŭvieś minuły hod było pradadziena 52 768 aŭtamabilaŭ. U paraŭnańni z 2019 hodam heta -18,2%, piša belretail.by.
Takaja dynamika pieršaha kvartała šmat u čym abumoŭlena ŭsploskam prodažaŭ u sakaviku minułaha hoda, kali ŭ pieryjad devalvacyi rubla biełarusy skupili ŭsie składskija zapasy dyleraŭ.
Padzieńnie prodažaŭ pačałosia z krasavika 2020 hoda. Asnoŭnymi pryčynami hetaha trendu ekśpierty nazyvajuć źnižeńnie dachodaŭ nasielnictva, źmianieńnie pakupnickich pryjarytetaŭ i zhortvańnie aŭtakredytavańnia.
U 2021 hodzie ekanamičnyja nastroi biełarusaŭ nie palepšylisia. Pavodle apošnich źviestak apytańnia Nacbanka, bolšaść nasielnictva našaj krainy čakaje ŭ budučyni inflacyju i rost koštaŭ, ustrymlivajecca ad bujnych pakupak i addaje pieravahu zachoŭvać źbieražeńni ŭ najaŭnaj valucie.
Kryzisnyja tendencyi ŭ Biełarusi ŭzmacniajucca, što ŭ pieršuju čarhu adbivajecca na prodažach darahich tavaraŭ. Chutčej za ŭsio padzieńnie rynku novych aŭtamabilaŭ sioleta praciahniecca. Mahčyma, niekatoryja dylery spyniać pracu, pakolki prodažy aŭtamabilaŭ zastanucca na nulavym uzroŭni.
Naprykład, nivodnaj mašyny nie pradali ŭ Biełarusi za pieršy kvartał takija marki, jak «Šeŭrale-Niva», Mitsubishi, MINI, Maserati i Ford.
Top-10 aŭtabrendaŭ pa kolkaści pradadzienych aŭtamabilaŭ
Marki | studzień | luty | sakavik | 1 kv. |
LADA (dva dylery) | 621 | 658 | 1050 | 2329 |
Geely (usie dylery) | 315 | 468 | 650 | 1433 |
Volkswagen | 256 | 374 | 445 | 1075 |
Kia (usie dylery) | 245 | 309 | 358 | 912 |
Škoda | 279 | 325 | 241 | 845 |
Renault | 239 | 206 | 284 | 729 |
Hyundai | 191 | 174 | 290 | 655 |
Toyota (2 dilera) | 58 | 95 | 123 | 276 |
Nissan | 56 | 68 | 99 | 223 |
Mazda | 35 | 34 | 37 | 106 |
Niadaŭni lidar rejtynhu — Renault — apuściŭsia na šostaje miesca.
Usie marki, jakija akazalisia za miežami Top-10, pradali mienš za 100 aŭto za kvartał.