«Pomsta za inšadumstva». Mastaki supołki «Pahonia» vystupili ŭ padtrymku źniavolenaha Alesia Puškina
Siabry mastackaj supołki «Pahonia» vystupili sa zvarotam u abaronu svajho kalehi Alesia Puškina. Ad 30 sakavika jon znachodzicca pad vartaj u hrodzienskim izalatary i abvinavačany ŭ «raspalvańni varožaści i reabilitacyi nacyzmu» svajoj tvorčaściu.
Radyjo Svaboda
Padstavaj dla kryminalnaj spravy stała karcina mastaka, pryśviečanaja ŭdzielniku antysavieckaha pavajennaha padpolla Jaŭhienu Žycharu. U siaredzinie sakavika praca ekspanavałasia na vystavie ŭ «Centry haradskoha žyćcia», nahadvaje Radyjo Svaboda.
«My, siabry tvorčaha abjadnańnia «Pahonia», aburanyja zatrymańniem našaha paplečnika, viadomaha mastaka Alesia Puškina. Heta talenavity tvorca, jaki zrabiŭ istotny ŭniosak u raźvićcio kultury i mastactva Biełarusi. Im napisanyja dziasiatki žyvapisnych tvoraŭ, pryśviečanych rodnaj ziamli, jaje historyi. Jon vykanaŭ rośpisy šerahu pravasłaŭnych i katalickich chramaŭ, udzielničaŭ u restaŭracyi kaścioła Śviatoha Stanisłava ŭ Mahilovie i stvareńni tam vialikaha žyvapisnaha pano. Tak, mastak viadomy svajoj nonkanfarmisckaj hramadzianskaj pazicyjaj, ale chiba inšadumstva — heta nahoda da kryminalnaj spravy?»— zadajucca pytańniem aŭtary lista.
Jany ličać, što pieraśled Alesia Puškina śviedčyć pra toje, što ŭ Biełarusi pierastała dziejničać fundamientalnaje humanitarnaje prava — prava na tvorčaść, kanstatujuć kalehi mastaka.
«Nu dyk tady treba zavočna pryciahvać da adkaznaści i zabaraniać tvory praletarskaha piśmieńnika Maksima Horkaha, jakija vyvučajucca ŭ našych škołach i VNU. U svaim ramanie «Maci» kłasik sacrealizmu apiavaje «ekstremista», zmahara z zakonnaj rasijskaj uładaj… My ličym nahodu, ahučanuju dla kryminalnaj spravy suprać Alesia Puškina, niezakonnaj. Jahonaje źniavoleńnie hruba parušaje kanstytucyjnyja pravy hramadzianina, čałavieka, tvorcy. Patrabujem spynić pieraśled našaha paplečnika, jaki ŭsprymajem pomstaj uładaŭ za jaho inšadumstva, niezaležnuju hramadzianskuju pazicyju», — adznačajecca ŭ zajavie supołki «Pahonia».
Alesia Puškina pryznali palitviaźniem
Mastak Aleś Puškin: Ministr zamiežnych spraŭ Ukrainy ŭhavorvaŭ zastacca, ale ja nie z tych, chto biažyć za miažu
Užo dvojčy sudzili pa kryminałkach — za pierakreśleny ściah BSSR i hnoj dla Łukašenki. Chto taki Aleś Puškin?
