Niečakanaje i važnaje adkryćcio: pieraksid vadarodu dapamahaje ŭ zmahańni z rakam
Navukoŭcy śćviardžajuć, što niekatoryja inhredyjenty farby dla vałasoŭ i antyŭzrostavaha kremu mohuć zatrymać raźvićcio raku małočnaj załozy na dva hady.
Fota Depositphotos.com
Zhodna z pracaj Instytuta daśledavańnia raku ŭ Łondanie, kali hetyja chimičnyja rečyvy ŭvodziacca ŭ puchlinu pierad radyjeterapijaj, jany pavialičvajuć efiektyŭnaść lačeńnia.
Razmova idzie pra spałučeńnie pieraksidu vadarodu, jaki vykarystoŭvajuć dla vybielvańnia vałasoŭ, i hijałuronavaj kisłaty — viadomaha srodku dla ŭvilhatnieńnia skury. U pieršaj fazie vyprabavańniaŭ hetyja rečyvy ŭvodzili 12 pacyjentam 2 razy na tydzień za hadzinu da terapii.
Praz hod stan 92% pacyjentaŭ palepšaŭ: ich puchliny całkam źnikli, źmienšylisia ŭ pamiery abo nie vyraśli. U vypadku sa zvyčajnaj radyjeterapijaj kolkaść padobnych vypadkaŭ składaje 60-65%, piša Daily Mail.
Pieraksid vadarodu — heta tannaje chimičnaje rečyva, jakoje pry lačeńni moža vyklikać praces śmierci kletak, jaki nazyvajecca apaptoz, i takim čynam dapamahčy ŭ baraćbie z rakam.
Tamu heta vielmi vyhadny srodak lačeńnia. Brytanskija navukoŭcy padličyli, što poŭny kurs takoj terapii budzie kaštavać mienš za 2800 dalaraŭ.
Ciapier kolkaść špitalaŭ, što ŭdzielničajuć u daśledavańni, pavialičyli z adnaho da piaci, a da ŭdziełu ŭ ich zaprasili novych pacyjentaŭ. Kali i ŭ hety raz pieraksid vadarodu i hijałuronavaja kisłata dobra spracujuć, možna budzie spadziavacca, što hetyja rečyvy dapamohuć i ŭ baraćbie ź inšymi vidami raku, pry jakich vykarystoŭvajecca radyjeterapija.