Jana stała pieršaj žančynaj-kapitanam u Jehipcie. A potym papaŭźli čutki, što jana zabłakavała Suecki kanał
Historyja Marvy Ełsielechdar.
Fota: Marva Ełsielechdar
U minułym miesiacy Marva Ełsielechdar zaŭvažyła niešta dziŭnaje.
Pa śviecie raźlatałasia navina pra vielizarny kantejnieravoz «Evier Hivien», zachrasły papiarok Sueckaha kanała. Z abodvuch kancoŭ kanała ŭtvaralisia ŭsio daŭžejšyja zatory — sudna zabłakavała ruch pa adnoj z najvažniejšych transpartnych arteryj śvietu.
I praktyčna adrazu ŭ internecie źjavilisia čutki ab tym, što vinavataja ŭ tym, što adbyłosia, Marva. Kali jana zazirnuła ŭ telefon, to vielmi ździviłasia.
«Ja była šakavanaja», — kaža 29-hadovaja Marva, pieršaja žančyna ź Jehipta, jakaja pracuje kapitanam na sudnie.
U toj momant, kali kantejnieravoz zabłakavaŭ Suecki kanał, Ełsielechdar znachodziłasia za sotni kiłamietraŭ adtul, u Aleksandryi, pieršym pamočnikam kapitana na sudnie «Aida IV».
«Aidaj IV» vałodaje Jehipieckaje viedamstva pa marskoj biaśpiecy, jana dastaŭlaje charčavańnie na majak u Čyrvonym mory. Na hetym sudnie taksama navučajuć kadetaŭ z Arabskaj akademii navuk, technałohij i marskoha transpartu (AANTMT), jakoj kiruje Liha arabskich dziaržaŭ.
Čutki pra toje, što za incydentam u Sueckim kanale staić Marva, stali pašyracca z-za padroblenaha skrynšota artykuła, nibyta apublikavanaha anhłamoŭnym resursam Arab News. Fejkavy zahałovak abviaščaŭ, što Ełsielechdar mieła niepasrednaje dačynieńnie da taho, što adbyłosia z «Evier Hivien».
Karystalniki «Tvitera» i «Fejsbuka» dzialilisia hetym malunkam dziasiatki razoŭ. U «Tvitery» navat źjaviłasia niekalki fejkavych akaŭntaŭ ad imia Ełsielechdar, dzie taksama śćviardžałasia, što jana źviazanaja z «Evier Hivien».
U asnovie sfabrykavanaha malunka była sapraŭdnaja historyja Arab News, apublikavanaja 22 sakavika. U joj Ełsielechdar raspaviadaje vydańniu, jak joj udałosia pabudavać karjeru ŭ «mužčynskaj» sudnachodnaj industryi i stać pieršaj žančynaj-kapitanam u Jehipcie.
Marva Ełsielechdar raspaviała ŭ intervju Bi-bi-si, što paniaćcia nie maje, adkul źjaviŭsia hety skrynšot i chto staić za iłžyvymi čutkami.
«Ja padumała, što, moža być, na mianie napadajuć, tamu što ja paśpiachovaja žančyna ŭ hetaj industryi abo tamu što ja jehipcianka, ale ja dakładna nie viedaju», — kaža jana.
Žančyny ciapier składajuć usiaho 2% ad usich supracoŭnikaŭ sudnachodnych kampanij u śviecie, pavodle danych Mižnarodnaj marskoj arhanizacyi. Marvie i raniej było niaprosta rabić karjeru.
Fota: Marva Ełsielechdar
Pa słovach Ełsielechdar, jana zaŭsiody lubiła mora, a na toje kab pajści pracavać u handlovy fłot, jaje natchniŭ brat, jaki pastupiŭ u AANTMT.
Choć Akademija na toj momant prymała tolki mužčyn, Marva ŭsio adno padała tudy dakumienty. Jaje pryniali tolki paśla apielacyj, jakija dajšli da tahačasnaha prezidenta Jehipta Chośni Mubaraka. Na kursie jana była adzinaj dziaŭčynaj z 1200 studentaŭ.
Pa słovach Ełsielechdar, padčas vučoby joj davodziłasia sutykacca z seksizmam na kožnym kroku.
«Na borcie byli tolki mužčyny, usie starejšyja za mianie, z roznym mientalitetam, i nikoha, chto b dumaŭ, jak ja, z kim ja mahła b mieć znosiny. Mnie było składana. Adnoj praz heta prajści i spravicca biez škody svajmu psichičnamu zdaroŭju było niaprostaj zadačaj», — uspaminaje jana.
«Ludziam u našym hramadstvie da hetaha času čužaja ideja taho, što dziaŭčaty mohuć pracavać u mory i pravodzić doŭhi čas udalečyni ad svaich siemjaŭ. Ale kali ty zajmaješsia tym, što lubiš, adabreńnie navakolnych dla ciabie nie samy važny faktar», — adznačaje Ełsielechdar.
Paśla zakančeńnia Akademii Marva pracavała na sudnie «Aida IV», dzie dasiahnuła pasady pieršaha pamočnika kapitana.
U 2015 hodzie jana ŭznačaliła ekipaž «Aidy IV», kali toj pieršym prajšoŭ pa tolki što pašyranym Sueckim kanale. Marva stała samym maładym kapitanam i pieršaj žančynaj-kapitanam ź Jehipta, jakaja ŭznačaliła sudna na hetych vodach.
Kali źjavilisia čutki, što nibyta na joj lažyć vina za błakavańnie Sueckaha kanała, Marva bajałasia, što heta adabjecca na jaje pracy.
«Falšyvy artykuł byŭ na anhlijskaj, i čutki dabralisia da roznych krain, — kaža jana. — Ja z usich sił starałasia abviarhać toje, što tam było napisana, tamu što heta adbivałasia na majoj reputacyi, na ŭsich tych namahańniach, što ja prykłała, kab patrapić tudy, dzie ja ciapier znachodžusia».
Ale akramia niehatyŭnych kamientaroŭ da falšyvaha skrynšota tam byli i takija, jakija, naadvarot, nadali Marvie ŭpeŭnienaści ŭ sabie.
«Było šmat padtrymki ad zvyčajnych ludziej i ludziej, ź jakimi ja pracuju, — kaža jana. — Ja vyrašyła dumać pra heta, i moj hnieŭ źmianiŭsia padziakaj. I varta zhadać, što ja stała jašče bolš znakamitaj, čym raniej».
U mai Marva Ełsielechdar zdaje svoj apošni ekzamien, kab atrymać poŭnaje zvańnie kapitana. Jana spadziajecca, što joj udasca praciahnuć natchniać žančyn, jakija žadajuć pracavać u sudnachodstvie.
«Ja chaču skazać žančynam, jakija chočuć stać marachodami, kab jany zmahalisia za toje, što lubiać i nie davali niehatyvu siabie chvalavać», — kaža Marva.
