SAAZ: Pašyreńnie karanavirusa ŭ Jeŭropie ŭzmacniajecca
I hetaja tendencyja praciahniecca ŭ nastupnyja tydni, zajaviŭ u intervju TASS dyrektar Jeŭrapiejskaha rehijanalnaha biuro Suśvietnaj arhanizacyi achovy zdaroŭja (SAAZ) Chans Kluhie.
«Na žal, pašyreńnie infiekcyi ŭzmacniajecca ŭ bolšaści krain Jeŭrapiejskaha rehijona, što pryvodzić da rostu štodzionnaj kolkaści vypadkaŭ [zaražeńnia] i śmierciaŭ. I my dumajem, što trend na nastupnyja čatyry tydni — rost hetych pakazčykaŭ. Ale heta mahčyma źmianić, kali vakcynacyja budzie prachodzić chutčej, kali ludzi buduć bolš vykarystoŭvać achoŭnyja maski», — adznačyŭ jon.
Treciaja chvala pandemii karanavirusa novaha typu ŭžo pryjšła ŭ Jeŭropu i raźvivajecca roznymi tempami ŭ krainach ES, pryznali ŭ Jeŭrakamisii. Pa słovach Kluhie, kab spravicca ź viasnovaj chvalaj, nieabchodna paskoryć vakcynacyju.
«U nas jość vydatnyja źviestki ź Izraila. Viadoma, jany papiarednija, ale my bačym, što, kali 60% nasielnictva pryščeplenyja, usie indykatary pačali palapšacca: mienš vypadkaŭ infikavańnia, špitalizacyi i mienš śmierciaŭ. Heta vielmi dobryja naviny, i my bačym takija ž papiarednija źviestki z Brytanii. Pasył tut: vakcyny pracujuć, i vakcyny ratujuć žyćci», — prakamientavaŭ jon.
Pry hetym dyrektar biuro nie biarecca pradkazać terminy zakančeńnia pandemii. «Ja i aptymist, i realist, ja nie baču piesimistyčnaha scenara, — skazaŭ Kluhie. — Ale treba adznačyć, što i 100-pracentnaha aptymistyčnaha scenara taksama niama. Tamu što aptymistyčny scenar — heta zakančeńnie epidemii, a ci znachodzicca kaniec blizka ci ŭsio jašče daloka, my nie viedajem».
Pavodle Jeŭrapiejskaha biuro SAAZ, kožny tydzień bolš za 20 tysiač čałaviek u rehijonie pamirajuć z-za karanavirusa, i hety lik ciapier vyšejšy, čym u hety čas u minułym hodzie. Najbolš surjoznaja situacyja skłałasia ŭ častkach rehijona, jakija paśpiachova spravilisia z COVID-19 u pieršym paŭhodździ 2020 hoda. U Centralnaj Jeŭropie, na Bałkanach i ŭ krainach Bałtyi zachvorvańnie, lik špitalizacyi i śmiarotnaść ciapier adny z samych vysokich u śviecie. Pry hetym 48 z 53 krain abo terytoryj paviedamili ab vyjaŭleńni brytanskaha štamu, jaki pastupova pačynaje daminavać u Jeŭropie.
