«Vykazaŭ niazhodu ź dziejańniami milicyi». U Babrujsku sudziać za padpał pastarunku
U Babrujsku pačaŭsia sud nad 42-hadovym mužčynam, jakoha abvinavačvajuć u padpalvańni apornaha punktu №4 na vulicy Kujbyšava letaś u vieraśni, paviedamlaje «Radyjo Svaboda».
Jamu vystavili abvinavačańnie pavodle č. 1 art. 339 (Chulihanstva) i č. 1 art. 14, č. 2 art. 218 (Zamach na naŭmysnaje źniščeńnie i paškodžańnie majomaści).
Spravu viadzie sudździa Natalla Ahładkava, dziaržaŭny abvinavaŭca — Mikałaj Ciškievič.
Pradstaŭnikoŭ UUS i Centru volnaha času i tvorčaści (u budynku apošniaha znachodzicca aporny punkt) na pasiedžańni niama.
Abvinavačany žyvie i prapisany ŭ Babrujsku, žanaty, maje traich dziaciej, adzin ź jakich niepaŭnaletni. Prakuror patłumačyŭ, u čym abvinavačvajecca padsudny.
«Hramadzianin E. ŭ stanie alkaholnaha apjanieńnia apoŭnačy 28 vieraśnia 2020 hodu z chulihanskich pamknieńniaŭ raźbiŭ šybu ŭvachodnych dźviarej i z vykarystańniem palimiernaj jomistaści z benzinam i zapalnicy ździejśniŭ padpał pamiaškańnia płoščaj 59,91 m2. U vyniku ahniom paškodziła ŭnutranaje adstrojvańnie ścienaŭ, stoli i padłohi, dźviery, elektraabstalavańnie i majomaść UUS Babrujskaha harvykankamu na sumu 124 rubli 48 kapiejek».
Dziaržaŭny abvinavaŭca pacikaviŭsia, čamu i kali ŭ mužčyny źjaviłasia dumka zrabić taki ŭčynak.
«My stajali sa znajomym u dvary doma na Kujbyšava, vypili piva, — adkazaŭ abvinavačany. — Pahladzieli videa na telefonie, dzie byŭ razhon demanstracyi — dziaŭčynku ciahnuli, žančyn razhaniali. Pad uražańniem i ŭźnikła takaja dumka. Ja vykazaŭ svaju niazhodu ź dziejańniami supracoŭnikaŭ milicyi, jakija tak hruba abychodziacca ź ludźmi. Pajšoŭ na zapraŭku, kupiŭ benzin i nakiravaŭsia ŭ bok apornaha punktu».
Mužčyna pryznaŭ svaju vinu ŭ častcy padpału i paškodžańnia pamiaškańnia i majomaści apornaha punktu. Ale kateharyčna nia zhodny z sumaj, u jakuju acaniŭ škodu Centar volnaha času i tvorčaści — 4644 rubli 14 kapiejek.
«Na maju dumku jak budaŭnika, tam ramontu nie pravodziłasia ŭžo hadoŭ 20, — zajaviŭ abvinavačany. — Nia dumaju, što za 10 chvilin mahła być naniesiena takaja škoda. Tut raźličany košt kapitalnaha ramontu, a nie ramontna-adnaŭlenčyja raboty».
Padčas śledztva jahonymi rodnymi na rachunak centru ahułam pieraličana 1740 rubloŭ, što, na dumku abvinavačanaha, całkam dastatkova dla pahašeńnia škody.
Pieršapačatkova ŭ padpale padazravali pratestoŭcaŭ i navat žurnalistaŭ, jakija aśviatlali akcyi ŭ horadzie: u niekatorych prajšli pieratrusy i kanfiskavali techniku.
Sudździa Natalla Ahładkava abviaściła pierapynak u pasiadžeńni da 5 sakavika.
