Praciahvajucca sudy nad piensijanierkami, zatrymanymi ŭ zasłaŭskaj elektryčcy
Učora, 2 sakavika, u sudzie Zavodskaha rajona paśpieli razhledzieć spravy 65-hadovaj Aleny Vasiljevaj i 60-hadovaj Raisy Aleckaj. Ich zatrymali jašče 26 lutaha za čytańnie biełaruskich knih u elektryčcy, paviedamlajuć pravaabaroncy.
Učastkovy Zavodskaha RUUS Aleh Haniestaŭ skłaŭ na Vasiljevu dva pratakoły: pa art. 23.34 i 23.4 KaAP. Ale sudździa Kaciaryna Muraška vyrašyła viarnuć pratakoł za niepadparadkavańnie na dapracoŭku, a pa art. 23.34 KaAP piensijanierka atrymała štraf 50 bazavych (1450 rubloŭ).
Raisie Aleckaj ŭ sudzie navat nie dali aznajomicca z materyjałami spravy. Ź jaje słoŭ, z Akreścina jaje vypuścili pa padpiscy ab jaŭcy ŭ RUUS, adkul 2 sakavika jaje adpravili ŭ sud. Pierad pačatkam sudovaha pracesu źjaviŭsia supracoŭnik milicyi z pastanovaj na zatrymańnie, jakuju sakratarka pavinna była vydać jamu tolki paśla pracesu. U vyniku, sudździa Anastasija Asipčyk pastanaviła aryštavać Aleckuju na 15 sutak u zale suda.
Siońnia ŭ sudzie nad Alenaj Lebiadzinskaj sudździa Asipčyk vydaliła z abvinavačvańnia BČB-vopratku, tamu što ŭ pratakole vopisu rečaŭ było paznačanaje adzieńnie «dazvolenaha» koleru. Ale žančynu ad maksimalnaha štrafu nie vyratavała i toje, što jana dahladaje 90-hadovuju maci. Sudździa aštrafavała Lebiadzinskuju na 870 rubloŭ (30 bazavych).
U akcyi ŭdzielničała i 49-hadovaja Ina Žakovič. Na sudzie byŭ apytany śviedka-milicyjant, pa słovach jakoha, jon znachodziŭsia ŭ adnym vahonie z udzielnicami i naziraŭ, jak jany «pikietavali». Na jaho formiennaj vopratcy byli zaklejenyja nadpisy, jakija pierad zatrymańniem adkryŭ, kab byŭ bačny nadpis «milicyja».
Sudździa Muraška navat prahladała th-kanał «Piensijaniery 97%», kab znajści videa z udziełam u akcyi. Adnak advakat zajaviŭ, što sud uziaŭ na siabie nienaležnyja funkcyi: zdabyvaje dokazy, jakich niama ŭ spravie.
