Žychara Homiela asudzili na try z pałovaj hady kałonii za sprobu padpału «Tabakierki»
Sud Čyhunačnaha rajonu Homiela 3 sakavika vynies prysud Vadzimu Cykunovu. Jaho abvinavacili ŭ padpale «Tabakierki» z dapamohaj «kaktejla Mołatava», paviedamlaje «Radyjo Svaboda».
Žychara Homla pakarali pazbaŭleńniem voli na 3,5 hoda źniavoleńnia za «złosnaje chulihanstva» (artykuł 339) i «niezakonnyja dziejańni z pradmietami, zroblenymi z vykarystańniem haručych rečyvaŭ» (artykuł 295-3).
Sprava tyčycca padziej 25 kastryčnika. Vadzim Cykunoŭ kinuŭ butelku z haručym rečyvam u bok «Tabakierki». Była naniesienaja škoda ŭ pamiery 26 rubloŭ. Abvinavačańnie traktuje jahonyja dziejańni jak «złačynstva z matyvaŭ palityčnaj varožaści». Vadzim Cykunoŭ śćviardžaje, što nia mieŭ anijakaj varožaści, nie chacieŭ padpalić «Tabakierku». «Kaktejl Mołatava» vyrabiŭ i kinuŭ napadpitku ŭ pustelnym miescy, dziela eksperymentu. U «Tabakierku», kaža, trapiŭ vypadkova.
Abvinavačańnie hruntavałasia ŭ tym liku na pakazańniach śviedak, jakija śćviardžali, što ŭ razmovach ź imi pra palityku Vadzim ličyŭ, što varta «radykalizavacca». Inšy dokaz viny žychara Homla — videa, dzie jon pryznajecca ŭ naŭmysnym padpale «Tabakierki».
Na sudzie abvinavačany raskazaŭ, što jaho zatrymali 18 listapada. Pryvieźli ŭ Centralnaje RAUS, dzie zahadali razblakavać telefon. «Kali ja admoviŭsia, mianie supracoŭnik udaryŭ u vucha. Tak, što ŭ fateli złamalisia piarednija nožki. Mnie pahražali, što padviesiać na kajdankach i buduć bić. Ja pryznaŭsia, što kidaŭ butelki. Potym, u IČU, da mianie prychodzili dvoje mužčyn, jakija skazali, što kali ja nie pahadžusia padpisać pakazańni, to mianie zaviazuć u SIZA KDB u Miensk. Tady zapisali videa z maim pryznańniem», — kazaŭ na sudzie Cykunoŭ.
Paśla izalatara jon źviarnuŭsia da lekaraŭ i zafiksavaŭ traŭmy (źniziŭsia słych), źviarnuŭsia ŭ milicyju, kab vinavatych u traŭmie pryciahnuli da adkaznaści. U kryminalnaj spravie jamu admovili.
Dziaržaŭny abvinavaŭca vykazaŭsia ŭ sprečkach, što vina Cykunova dakazanaja, i paŭtaryŭ tezu pra «palityčnuju varožaść». Jon prasiŭ pakarać hamielčuka pazbaŭleńniem voli na čatyry z pałovaj hady.
Advakatka nastojvała, što ŭ dziejańniach jaje padabaronnaha niama anijakaj «palityki», heta było zvyčajnaje chulihanstva, zroblenaje napadpitku. Jana ličyć, što pakazańni na śledztvie pra naŭmysny padpał «Tabakierki» padabaronny daŭ pad psychalahičnym i fizyčnym ciskam.
«Kab jon sapraŭdy naŭmysna chacieŭ padpalić «Tabakierku», to možna było padyści ŭ ciemry i padpalić. A tak — niećviarozaha čałavieka naviedała takaja ideja. Pakarańnie, jakoha prosić abvinavačańnie, zanadta surovaje. Moj padabaronny nie sudzimy, maje małaletniaje dzicia, i žyćcio jaho było vyklučna stanoŭčaje», — kazała abaronca i prasiła dać Cykunovu «chimiju».
Abvinavačany ŭ apošnim słovie zaznačyŭ, što nie pieraśledavaŭ palityčnych metaŭ. «Mnie pahražali ŭ IČU, što na mianie «paviesiać» usie padpały «Tabakierak» pa horadzie. Pakazańni ad mianie jany atrymali pad psychalahičnym i fizyčnym ciskam. Mianie źbili ŭ milicyi. Hetyja dziejańni — nikomu nie patrebny eksperyment. Ja prašu prabačeńnia ŭ svaich baćkoŭ, žonki, dački. Prašu nie pazbaŭlać mianie svabody», — kazaŭ žychar Homla.
