Sinoptyki raskazali pra anamalii lutaha
Tempieratura pavietra ŭ Biełarusi ŭ lutym była nižejšaj za klimatyčnuju normu na 2,2 hradusa, paviedamili BiełTA ŭ Hidramiecie.
Fota Nadziei Bužan
«Siaredniaja tempieratura lutaha 2021 hoda skłała -6,5, što nižej za klimatyčnuju normu na 2,2 hradusa. Z 1945 hoda taki chałodny luty ŭ siarednim byvaŭ raz u try hady, ale apošni raz adznačaŭsia ŭ 2012 hodzie. Admoŭnaja anamalija raspaŭsiudziłasia paŭsiudna», — raskazali ŭ Biełhidramiecie.
Pieršaja i druhaja dekady miesiaca byli vielmi chałodnymi (na 4, 4 i 6 hradusaŭ nižej za normu adpaviedna). Treciaja dekada była vielmi ciopłaj (na 5,5 hradusa vyšej za normu).
Absalutny maksimum tempieratury pavietra byŭ zarehistravany ŭ Breście 25 lutaha i skłaŭ +15. Absalutny minimum byŭ adznačany ŭ Brahinie 19 lutaha i skłaŭ -29,4 hradusa.
Kolkaść apadkaŭ u siarednim pa Biełarusi ŭ minułym miesiacy skłała 38,7 mm, abo 111% klimatyčnaj normy. Ich lišak adznačaŭsia na bolšaj častcy terytoryi krainy.
Najbolšaja kolkaść apadkaŭ vypała ŭ Mahiloŭskaj i Homielskaj abłaściach: u siarednim 57,9 mm (175% normy) i 55,9 mm (164%) adpaviedna. Najmienšaja — u Viciebskaj vobłaści (u siarednim 21,6 mm, abo 54% normy).
