«Toje, što inśpiektar zastaŭsia žyvy, — heta vypadkovaść». Sudziać kiroŭcu, jaki ŭciakaŭ na raźbitaj mašynie ad sotni siłavikoŭ u noč inaŭhuracyi
36-hadovamu minčuku Alaksieju Ścierlikavu pahražaje da 5 hadoŭ źniavoleńnia za padziei, jakija razyhralisia na praśpiekcie Dziaržynskaha i prylehłych vulicach u noč paśla inaŭhuracyi Alaksandra Łukašenki.
Ścierlikaŭ pakul nie maje statusa palitviaźnia.
Kala sotni siłavikoŭ abstupili aŭtamabil sa Ścierlikavym i raźbivajuć jaho.
Praces nad im pačaŭsia ŭ Zavodskim sudzie Minska. Sudździa — Hienadź Jankoŭski. Prakuror — Volha Dzilindzievič. Na pasiedžańnie puskajuć maksimum šeść čałaviek, tamu ŭ zału traplajuć nie ŭsie achvotnyja.
Pozna ŭviečary 23 vieraśnia 2020 hoda Alaksiej Ścierlikaŭ razam z 28-hadovaj žonkaj Taćcianaj jechali na «Falksvahienie» (naležyć kampanii, dzie Ścierlikaŭ pracuje namieśnikam dyrektara) z kafe kala stancyi «Michałova». Tam Taćciana vypiła piva, trochi pakaštavaŭ jaho i Alaksiej. Ale nasupierak infarmacyi ź pieršasnych milicejskich pres-relizaŭ pjanym jon nie byŭ — ź jahonymi 0,25 pramile možna kiravać aŭtamabilem.
Aproč ich, u mašynie byli dva chłopcy, jakija paprasili padkinuć ich u centr. Kali jany ŭciakli z mašyny, nichto tak i nie zrazumieŭ.
Alaksiej z Taćcianaj jechali pa praśpiekcie Dziaržynskaha ŭ bok centra, pakul u rajonie budynka haradskoha DAI nie ŭpierlisia ŭ siłavikoŭ. Reč u tym, što za niekatory čas da hetaha zamarudziŭsia ruch pa praśpiekcie. Na razhon patencyjnych pratestoŭcaŭ kinuli śpiectechniku i jak minimum 100 siłavikoŭ. Jak vidać na videa, źniatym ź bližejšych damoŭ, ludziej vyciahvali z mašyn i źbivali.
Ścierlikavy na svaim «Falksvahienie» apynulisia ŭ centry ŭvahi. Na mašynu abrynulisia ŭdary dubinkami, łabavoje škło było raźbitaje ŭščent. Alaksiej zrabiŭ efiektny razvarot, paśla na paru imhnieńniaŭ spyniŭsia. Da jaho pabiehli ŭsie siłaviki, što byli na praśpiekcie, i kinuŭsia na ŭcioki pa sustrečcy. Ledź nie sutyknuŭsia z aŭtamabilem DAI, adnak vyruliŭ, niahledziačy na toje, što praz łabavoje škło mała što było vidać. Niekalki aŭtamabilaŭ DAI ź mihałkami adpravilisia ŭ pahoniu.
«Supracoŭniki DAI jamu ž ničoha nie zrabili, kab ich bajacca i ŭciakać. Jon jechaŭ u łabavuju, my ŭžo padrychtavalisia da ŭdara», — kazaŭ na sudzie adzin ź inśpiektaraŭ-śviedak.
Kali pasłuchać prakurora, to historyja pačałasia mienavita ŭ hety momant — kali raźbity «Falksvahien» prajechaŭ mima aŭtamabilaŭ DAI. Što było raniej, abvinavačvańniem nie vyvučajecca i nie prahavorvajecca.
Alaksiej Ścierlikaŭ paviarnuŭ z praśpiekta Dziaržynskaha na Ščorsa, adtul na Čyhunačnuju, paśla raźviarnuŭsia, znoŭ apynuŭsia na Ščorsa i ŭrešcie zbočyŭ na vuzkuju vulicu Razinskaj. Tut jaho zacisnuli dva aŭtamabili DAI, «Škoda» i «Džyli».
Pasažyr pieršaha z patruloŭ, inśpiektar Kaśpiarovič, vyskačyŭ sa svajoj «Škody», kinuŭsia da «Falksvahiena», adčyniŭ dźviery kiroŭcy i chacieŭ dastać klučy zapalvańnia. Ale nie paśpieŭ — Ścierlikaŭ uklučyŭ zadniuju pieradaču i rušyŭ zadnim chodam.
«Ja adskočyŭ, razumiejučy, što mianie zaciahnie [pad mašynu], — patłumačyŭ u sudzie Kaśpiarovič.
Cikavaja akaličnaść — pracoŭny dzień Kaśpiaroviča pačaŭsia a 5-j ranicy, zadoŭha da pačatku inaŭhuracyi. I praciahvaŭsia minimum 19 hadzin ź pierapynkam na abied! Heta adna z pryčyn taho, što jaho nahrudnaja kamiera nie pracavała — akumulatara nastolki nie moža chapić. Dyj sami inśpiektary kazali, što zapis pracuje nie ŭvieś čas, a tolki kali jany vyjduć z mašyny i ŭklučać kamieru sami.
Dyk voś, u momant, kali «Falksvahien pajechaŭ nazad, z zadniaha «Džyli» vybieh inšy inśpiektar, Michaił Zavadski. Jak možna ŭbačyć na videa — spačatku jon udaryŭsia ab zadniuju častku «Falksvahiena», paśla čaho jaho ŭdaryli dźviery «Falksvahiena», adčynienyja Kaśpiarovičam. Ad hetaha Zavadskaha adkinuła na jaho «Džyli».
Paśla hetaha incydentu Zavadski pravioŭ adzin dzień u balnicy i jašče miesiac na balničnym. Jak paznačana ŭ dakumientach, inśpiektar DAI atrymaŭ atrymaŭ «siniaki i ranki, jakija nie paciahnuli karotkačasovaha rasstrojstva zdaroŭja». Za heta jon choča 20 tysiač rubloŭ kampiensacyi. Čamu mienavita takaja vializnaja suma?
«Majo žyćcio biascennaje. Acanić jaho ja nie mahu», — zajaviŭ inśpiektar DAI u sudzie.
Praź niekalki mietraŭ «Falksvahien» kančatkova spyniŭsia. Daišniki vyciahnuli Ścierlikava z mašyny, choć atrymałasia nie adrazu — jon byŭ pryšpileny.
Jon śćviardžaje, što kazaŭ: «Ja nie supraciŭlajusia. Što adbyvajecca?». Daišniki ž pierakonvajuć, što čuli tolki słovy «što adbyvajecca».
Ścierlikaŭ pakul nie davaŭ pakazańniaŭ u sudzie, tamu jaho viersija raźvićcia padziej da kanca nieviadomaja.
Jaho žonka Taćciana patłumačyła, što jaje pakłali na ziamlu, pakul muža bili. Praces zatrymańnia adbyvaŭsia pad voknami žyłych damoŭ. Kali žychary stali kryčać z voknaŭ i nazyvać daišnikaŭ fašystami, źbićcio spyniłasia.
Ścierlikava pavieźli praviarać na ałkahol (akazalisia tyja samyja 0,25 pramile), paśla skłali niekalki pratakołaŭ pa linii DAI. Urešcie jon apynuŭsia na Akreścina, a praź niekalki dzion byŭ pieraviedzieny ŭ SIZA na Vaładarskaha, dzie znachodzicca da hetaha času.
Jamu inkryminujuć častku 2 artykuła 363 Kryminalnaha kodeksa — supraciŭ supracoŭniku orhanaŭ unutranych spraŭ pry vykanańni, spałučany z prymianieńniem hvałtu. Mahčymaje pakarańnie — chimija da 5 hadoŭ ci kałonija da 5 hadoŭ.
Ale kab pryznać čałavieka vinavatym pa hetym artykule, treba dakazać, što jon dziejničaŭ znarok.
Pazicyja Alaksieja Ścierlikava i jaho advakata Andreja Birukova ŭ tym, što naŭmysnaści ŭ najeździe na daišnika nie było — kali kiroŭca adjazdžaŭ zadnim chodam, jon nie moh ubačyć, chto padskokvaje da mašyny zzadu. Kali «naŭmysnaść» usio ž prybrać, to sprava moža być pierakvalifikavanaja na častku 1 artykuła 363. Pakarańnie pa joj — ad papraŭčych prac i aryštu (jaho maksimalny termin — 3 miesiacy, što ŭžo bolš za adsiedžanaje Ścierlikavym) da dvuch hadoŭ kałonii.
Praŭda, pakul niepadobna da taho, kab 57-hadovy sudździa Hienadź Jankoŭski źbiraŭsia traktavać zakanadaŭstva tak, jak i abarona.
U paślavybarčy čas Jankoŭski pravioŭ kala 20 sudoŭ pa artykule 23.34, absalutnaja bolšaść pracesaŭ skončvałasia praciahłymi sutkami dla zatrymanych demanstrantaŭ.
Padčas pieršaha dnia suda jon adčytvaŭ advakata, jaki zadavaŭ pytańni śviedkam-daišnikam — «Niejak tak akcentujecie ŭvahu… Vy paaściarožniej z hetym», — i, jak vyhladała, rasstroiŭsia, kali akazałasia, što ŭ kancy pracoŭnaha dnia daviadziecca razhladać jašče adno chadajnictva abarony — ab źmienie miery strymańnia na padpisku ab niavyjeździe. Naturalna, Ścierlikava pakinuli za kratami.
«Toje, što inśpiektar zastaŭsia žyvy, — heta vypadkovaść. Možna tak skazać?» — adno z vykazvańniaŭ sudździ ŭ adras śviedki-daišnika.
