U Viciebsku baćku dvuch małych dziaciej adpraviać na chimiju za kamientar suprać rabotnika milicyi
Maładoha baćku dvuch maleńkich dziaciej ź Viciebska prysudzili da dvuch hadoŭ «chimii» za kamientar u Instagram — nibyta jon abraziŭ milicyjanta. 22 lutaha sud Pieršamajskaha rajona Viciebska pryznaŭ 30-hadovaha viciablanina vinavatym u abrazie pradstaŭnika ŭłady ŭ suviazi z vykanańniem im słužbovych abaviazkaŭ, piša NNV.
Pa viersii suda 3 kastryčnika minułaha hoda małady čałaviek abraziŭ milicyjanta-kiroŭcu roty patrulna-pastavoj słužby milicyi hramadskaj biaśpieki AUS administracyi Pieršamajskaha rajona Viciebska — raźmiaściŭšy kamientar, u jakim źmiaščałasia vykazanaje ŭ nieprystojnaj, abraźlivaj formu ŭ adras paciarpiełaha siłavika, niehatyŭnaja acenka.
Na sudzie mužčyna całkam pryznaŭ siabie vinavatym u inkryminavanym jamu złačynstvie. Sud paličyŭ źmiakčalnymi adkaznaść abstavinami čystasardečnaje raskajańnie va ŭčynienym złačynstvie i najaŭnaść na ŭtrymańni dvuch małaletnich dziaciej. Abciažarvalnych abstavinaŭ sudździa nie znajšoŭ. Raniej chłopiec da sudu nie pryciahvaŭsia.
Adnak, niahledziačy na ŭsio vyšej pieraličanaje, na padstavie artykuła 369 KK viciablanina prysudzili da abmiežavańnia voli z nakiravańniem u vypraŭlenčuju ŭstanovu adkrytaha typu na 2 hady. Akramia taho ŭ jaho kanfiskavali smartfon «Xiaomi Redmi 7A», jak srodak ździajśnieńnia złačynstva.
Jak bačym, sud pryznačyŭ baćku dvuch maleńkich dziaciej praktyčna maksimalnaje pakarańnie, praduhledžanaje sankcyjami hetaha artykuła (da 3 hadoŭ abmiežavańnia voli).
Hety prysud u zakonnuju siłu pakul što nie ŭstupiŭ i moža być abskardžany i apratestavany va ŭstanoŭlenym zakonam paradku.
