Mierkavany pasoł RF u Biełarusi kazaŭ, što Majdan rychtavała Amieryka, a ŭ Rasii dva sajuźniki — armija i fłot
Novym pasłom Rasii ŭ Minsku stanie Jaŭhienij Łukjanaŭ, śćviardžaje «Kommiersant'».
Pra heta paviedamili vydańniu try infarmavanyja krynicy.
«Kamiersant» kałamburyć, nazyvajučy Łukjanava «pasłom śpiecyjalnaha kaznačeńnia» i adznačaje, što jon «viedaje lik hrošam».
69-hadovy Jaŭhienij Łukjanaŭ ad 2016-ha źjaŭlajecca pasłom u Łatvii. Jon skončyŭ Leninhradski dziaržaŭny univiersitet, viedaje anhlijskuju i francuzskuju movy, na dypłamatyčnaj pracy z 1984 hoda. Taksama byŭ na kirujučych pasadach u bankaŭskaj śfiery, a da pryznačeńnia ŭ Łatviju byŭ namieśnikam sakratara Rady biaśpieki Rasii.
Pa słovach surazmoŭcaŭ «Kommiersanta», kandydatura ŭzhodnienaja, Pucin padpiša zahad ab pryznačeńni ŭ najbližejšy čas.
Adzin ź jaho kaleh pa Radzie biaśpieki RF u hutarcy z «Kamiersantam» acharaktaryzavaŭ Łukjanava jak «surjoznaha čynoŭnika, jaki nie baicca prymać rašeńni i brać na siabie adkaznaść».
Jon publična kamientavaŭ kanfliktnyja siužety nakštałt situacyi va Ukrainie. Naprykład, zajaŭlaŭ, što Majdan 2013—2014 hadoŭ Zachad zładziŭ, kab uskładnić žyćcio Rasii.
— Piać miljardaŭ dalaraŭ byli patračanyja ZŠA na padrychtoŭku Majdana. Cikava, daradcy Abamy dakładvali jamu, što ŭ vyniku ŭsich hetych dziejańniaŭ Krym vierniecca ŭ RF abo što rejtynh Pucina paśla hetaha zaškalić za 80%? Chacieli nam adpomścić za siryjskuju chimičnuju zbroju, za iranskuju jadziernuju prahramu, za spadara Snoŭdena, moža, jašče za niešta, karaciej, chacieli «padkłaści takoha vožyka pad naša cieła». Padkłali, ale sami ŭkałolisia, — zajaviŭ Łukjanaŭ RIA «Novosti» ŭ 2014 hodzie.
Jon taksama zajaŭlaŭ, što łahiery pa padrychtoŭcy bajevikoŭ dla Majdana byli arhanizavanyja ŭ Polščy.
Niaźmiennymi sajuźnikami Rasii Jaŭhienij Łukjanaŭ nazyvaŭ armiju i fłot. «Heta žorstkaja impierskaja acenka Alaksandra III, ale inšaj niama», — adznačaŭ jon.
«Kommiersant» nahadvaje, što Rasija ŭ treci raz za apošnija try hady mianiaje pasła ŭ Minsku.
Michaił Babič staŭ pasłom u žniŭni 2018 hoda i amal adrazu trapiŭ u niałasku.
Dźmitryj Mieziencaŭ, jaki zajmaje hetuju pasadu ciapier, jak čakajecca, stanie dziaržsakratarom Sajuznaj dziaržavy. Hryhoryj Rapota, jakomu spoŭniłasia 77 hadoŭ, sydzie ŭ adstaŭku ŭ najbližejšy čas.
