Jak u Minsku źniščajuć śnieh FOTY
Ad pačatku zimy śniehapłavilnaja stancyja, što znachodzicca na vulicy Mašynabudaŭnikoŭ, pierapracavała 285 tysiač ton śniehu.
Siudy samazvały niaspynna zvoziać śnieh.
Fota Nadziei Bužan
«Stancyja moža ŭtylizavać za sutki kala 5 tysiač kuboŭ śniehu. Heta 333 «MAZy». Kali ŭsio idzie biez techničnych pierapynkaŭ i zatrymak, u niekatoryja dni prymajem 350 i navat 400 hruzavikoŭ. Ale prypynki na prafiłaktyku i ahlad, a taksama ačystku pryjomnaj kamiery nieabchodnyja», — raspavioŭ namieśnik načalnika ŭčastka pradpryjemstva Uładzimir Rubiec «Minsk-Navinam».
Śnieh adpraŭlajuć u sieparatar-drabniłku, dzie jaho rastoplivaje ściokavaja ciopłaja vada ŭ 16 hradusaŭ. Jana pastupaje siudy z kanalizacyjna-pompavaj stancyi i pa kruzie adpraŭlajecca nazad u kalektar.
Sieparatar-drabniłka. Źvierchu na jaho vyhružajuć śnieh, a ciopłaja vada, jakaja pastupaje źnizu, rastoplivaje jaho.
Treba taksama adsočvać razhruzku. U kuzavie mohuć być kamiani, haliny i inšaje bujnoje śmiećcie, jakoje moža paškodzić abstalavańnie.
U časie płaŭleńnia śniehu piasok asiadaje na dno. Pa miery napaŭnieńnia jaho razam sa śmiećciem vyhružajuć u kantejnier, a zatym vyvoziać na adzin z palihonaŭ ćviordych bytavych adchodaŭ pradpryjemstva «Ekares».
Kožny samazvał razhružajecca ŭ siarednim za 2-3 chviliny. Śnieh apracoŭvajecca bieśpierapynna. Sioleta ad pačatku zimovaha siezonu i pa 10 lutaha tut utylizavali kala 53 tysiač kuboŭ śniehu. Letaś za ŭvieś siezon — usiaho 150 kuboŭ.
U kancy sakavika stancyja rychtujecca da kansiervacyi.
