Idzie abłava na smarhonskich aktyvistaŭ. Napiaredadni ŭ sudzie chtości vyhuknuŭ «Žyvie Biełaruś!»
Uviečary 19 lutaha pa Smarhoni prakaciłasia chvala zatrymańniaŭ. Vyhladaje, što praz niadaŭni vypadak u sudzie, kali paśla abviaščeńnia prysudu smarhoncam za raspaŭsiud ulotak chtości vyhuknuŭ «Žyvie Biełaruś!», a staršynia suda vyklikała milicyju.
Smarhoncy, jakich padazravali ŭ rasklejcy ŭlotak. Pieršy sprava — Rusłan Valuk.
Napačatku było viadoma pra zatrymańnie Ramualda Ułana i Ludmiły Sulžyckaj, paviedamlajuć pravaabaroncy «Viasny».
Illa Pietunoŭ u 16:00 panios skarhu ŭ RAUS i nie viarnuŭsia, byŭ tam i zatrymany.
Supracoŭniki milicyi taksama prychodzili za Rusłanam i Luboŭju Valukami. Dziaŭčyny doma nie było, a pra Rusłana maci skazała, što jamu drenna, što jana vyklikaje jamu chutkuju.
Zatrymany i Jaŭhien Novik ź Siarhiejem Trajem. Jość źviestki, što na zatrymanych składajuć pratakoły pa artykule 23.34 KaAP.
Nahadajem, sud Smarhonskaha rajona 18 lutaha abvieściŭ prysud u kryminalnaj spravie Rusłana Valuka i Inesy Markavaj, jakich abvinavacili ŭ paklopie na supracoŭnikaŭ milicyi.
Valuku prysudzili dva hady abmiežavańnia voli z nakiravańniem va ŭstanovu adkrytaha typu, Markavaj — dva hady «chatniaj chimii».
Paśla abviaščeńnia prysudu ŭ kalidory niechta kryknuŭ «Žyvie Biełaruś!». U adkaz pačułasia družnaje «Žyvie!». Adrazu ž staršynia suda Ludmiła Piatrova zabaraniła dziažurnamu milicyjanieru vypuskać z suda prysutnych, a sama vyklikała milicyju. U budynku zabłakavali kala 20 čałaviek. Častka ich źbiehła praz vakno, a dzieviać čałaviek, jakija zastalisia ŭ sudzie, paviali ŭ miascovy RAUS.
