18-hadovaha, jaki paśla źbićcia 12 žniŭnia pierasoŭvaŭsia ŭ invalidnym vazku, asudzili da troch hadoŭ chimii
Sud Savieckaha rajona 19 lutaha asudziŭ 18-hadovaha aktyvista anarchisckaha ruchu Ivana Krasoŭskaha na try hady abmiežavańnia voli z nakirovańniem u papraŭčuju ŭstanovu adkrytaha typu — «chimii», paviedamlajuć pravaabaroncy.
Źviarnicie ŭvahu na fota. Jano publikujecca ŭpieršyniu. Jano było zroblenaje ŭ tyja žnivieńskija dni, kali pad ciskam hramadstva siłaviki syšli z vulic i ludzi svabodna vyražali svaju pazicyju
Chłopca vyzvalajuć u zale suda. Ivana pryznali vinavatym pa č. 1 art. 342 Kryminalnaha kodeksa i abvinavacili ŭ pierakryćci daroh u noč z 10 na 11 žniŭnia na «Ryzie», što paciahnuła škodu «Minsktransu» na sumu bolš za 5,6 tysiačy rubloŭ. Na sudzie stała viadoma, što telefon chłopca prasłuchoŭvaŭsia jašče z 3 sakavika 2020 hoda, mienavita telefonnyja razmovy z akcyi pratestu i lahli ŭ asnovu abvinavačvańnia Ivana. Spravu palitviaźnia razhladała sudździa Maryna Fiodarava.
Ivana Krasoŭskaha abvinavacili ŭ tym, što ŭ noč z 10 na 11 žniŭnia 2020 hoda kala HC «Ryha» «padčas niezakonnaha masavaha mierapryjemstva publična vykrykvaŭ łozunhi, błakavaŭ ruch transpartu šlacham pierakryćcia prajeznaj častki. Paśla čaho, niahledziačy na patrabavańni pravaachoŭnikaŭ, admoviŭsia pakinuć jaje, zaklikaŭ da anałahičnych dziejańniaŭ inšych hramadzian». Pa viersii abvinavačvańnia, heta paciahnuła praciahłaje parušeńnie hramadskaha spakoju, stvaryła pieraškody dla narmalnaj pracy transpartu na praciahu 5 hadzin na vulicy Surhanava, čym było abmiežavana prava inšych hramadzian na spakojnuju pracu, adpačynak i svabodnaje pieramiaščeńnie. U vyniku dziejańniaŭ abvinavačanaha majomaści KTUP «Minsktrans» naniesienaja škoda na sumu bolš za 5,6 tysiačy.
Chłopca zatrymali pieršy raz 12 žniŭnia, tady siłaviki mocna źbili jaho da stanu invalidnaha vazka. Druhi raz Ivana zatrymali ŭ kancy vieraśnia — užo ŭ miežach kryminalnaj spravy pa č. 2 art. 293 Kryminalnaha kodeksa. Potym spravu Ivana pierakvalifikavali na bolš miakki artykuł — na č. 1 art. 342 Kryminalnaha kodeksa.
Vinu Ivan pryznaŭ častkova. Jon pryznaje tolki toje, što vykrykvaŭ łozunhi i plaskaŭ u dałoni. Taksama Krasoŭski nie pryznaŭ hramadzianski pazoŭ.
Na sudzie Krasoŭski skazaŭ:
«Ja małady čałaviek 18 hadoŭ, niadaŭna skončyŭ škołu, toje, što ja ŭbačyŭ na Ryzie, — ja ŭbačyŭ upieršyniu ŭ žyćci, ja byŭ na emocyjach. Heta nienarmalna, kali supracoŭniki milicyi źbivajuć ludziej, supracoŭnikaŭ chutkich».
Dziaržaŭnaja abvinavaŭca pamočnica prakurora Savieckaha rajona Anastasija Maliko paprasiła sud pakarać Ivana Krasoŭskaha tryma hadami «chimii». Mienavita takoje pakarańnie i pryznačyła sudździa Maryna Fiodarava.
