Čamu ŭ niekatorych simptomy kavidu zachoŭvajucca na praciahu miesiacaŭ
U śniežni Nacyjanalnaja statystyčnaja słužba Vialikabrytanii (Office for National Statistics) apublikavała źviestki, jakija pakazali, što kožny dziasiaty infikavany maje zaciažnuju formu zachvorvańnia: simptomy zachoŭvajucca na praciahu troch miesiacaŭ, a časam i bolš.
Fota Depositphotos.com
Usio bolš źviestak źjaŭlajecca nakont karanavirusa, jaki jašče na pačatku 2020 hoda byŭ zusim nieviadomaj chvarobaj. Tady ŭrady krain paličyli, što heta reśpiratornaje zachvorvańnie padobnaje da hrypu, ale ciapier stała zrazumieła, što kavid dziejničaje pa-inšamu. Adzin z aśpiektaŭ chvaroby, jaki navukoŭcy razumiejuć usio lepš, — jaho praciahłaść, piša The Independent.
Zhodna ź infarmacyjaj SAAZ, u bolšaści vypadkaŭ dvuch tydniaŭ dastatkova dla taho, kab arhanizm daŭ rady virusu. Adnak mnohija ludzi paviedamlajuć pra šyroki śpiektr simptomaŭ, ad jakich jany pakutujuć jašče na praciahu doŭhaha pieryjadu času. Siarod ich stomlenaść, dychavica, bol u myšcach i sustavach, adsutnaść kancentracyi i navat prykmiety depresii. Usio heta pieraškadžaje chutka viarnucca da zvykłaha žyćcia paśla pieraniesienaj chvaroby.
Daśledavańnie ad King's College London vyjaviła, što doŭhaterminovyja nastupstvy źviazanyja ź ciažkaściu zachvorvańnia: pa statystycy pacyjenty ź lohkaj formaj kavidu čaściej sutykajucca z vyšejpieraličanymi simptomami paśla chvaroby.
Taksama było vyjaŭlena, što niekatoryja ludzi mohuć być bijałahična, ad pryrody schilnyja da takoj reakcyi, jakaja čaściej za ŭsio prajaŭlajecca ŭ vyhladzie chraničnaj stomlenaści. U pryvatnaści, zychodnyja ŭzroŭni dźviuch malekuł u arhaniźmie, viadomych jak interlejkin 6 i interlejkin 10, pakazvajuć, nakolki vierahodna raźvićcio ŭ ludziej chraničnaj stomlenaści paśla kavidu.
