U spravie Kanapajki, jaki zapieniŭ dźviery ŭ kvateru supracoŭnicy milicyi, novy abarot: paciarpiełaja prosić zavieści jašče adnu kryminałku
U sudzie Frunzienskaha rajona Minska praciahvajecca razhlad kryminalnaj spravy ŭ dačynieńni da minčuka, jaki zapieniŭ dźviery ŭ kvateru supracoŭnicy milicyi. Hramadzianina Rasii Ihara Kapanajku abvinavačvajuć pa dvuch artykułach KK: artykuł 339 (Chulihanstva) i artykuł 369 (Abraza pradstaŭnika ŭłady ŭ suviazi z vykanańniem im słužbovych abaviazkaŭ), paviedamlaje spring96.org.
Spravu razhladaje sudździa Alena Bušava, dziaržabvinavaŭca — prakuror Hreskaja. Paciarpiełaja pa spravie — pres-aficer Centralnaha RUUS Minska Taćciana Aboznaja.
Ihar Kapanajka maje dazvoł na žycharstva ŭ Biełarusi, vajskovy piensijanier.
Z materyjałaŭ śledstva viadoma, što dniom 13 listapada 55-hadovy mužčyna zajšoŭ u padjezd adnaho z damoŭ u Frunzienskim rajonie Minska i z «chulihanskich pamknieńniaŭ» zaliŭ mantažnaj pienaj ŭvachodnyja dźviery kvatery supracoŭnika orhanaŭ unutranych spraŭ. Taksama jon zapieniŭ miechanizm zamka dźviarej i paštovuju skryniu.
Akramia taho, jak śćviardžaje Śledčy kamitet, na paštovaj skryni abvinavačany napisaŭ frazu, jakaja publična abražaje supracoŭnicu milicyi ŭ suviazi z vykanańniem joju słužbovych abaviazkaŭ i schavaŭsia ź miesca zdareńnia.
16 lutaha praciahvajecca sudovaje śledstva.
Paciarpiełaja Taćciana Aboznaja vystupiła z chadajnictvam dałučyć jaje piśmovyja pakazańni da spravy.
Jana paviedamiła, što ŭ minuły raz jechała na sud z dumkaj, što nie treba stroha karać abvinavačvajemaha. Ale paśla taho jak pabyvała na sudzie — nastrojenaja na strohaje pakarańnie.
«Ja ličyła, što jamu budzie soramna i baluča, i jon raskajecca i paprosić prabačeńnia. Ale pačutaje ŭ zale suda prymusiła mianie źmianić svajo rašeńnie. Bo padsudny zusim nie raskajaŭsia. Vioŭ u sudzie siabie nachabna. Padsudny mianie abhavaryŭ. I ŭsio dziela taho, kab źmianić kvalifikacyju złačynstva na bolš miakkaje.
Jon paviedamiŭ sudu, byccam ja kamientavała padziei, źviazanyja z Ramanam Bandarenkam. Heta nachabnaja chłuśnia! Ideja z pomstaj pryjšła jamu nie adrazu, bo na pieršych dopytach jon pra heta nie kazaŭ. Varta było jamu zapuścić hetuju chłuśniu, jak niekatoryja arhanizacyi, jakija adnosiać siabie da niezaležnych ŚMI, tut ža jaje padchapili.
Jany apublikavali hetuju infarmacyju, navat nie dačakaŭšysia prysudu, nie pravieryli, nakolki dakładnaja viersija padsudnaha. Usio heta spłanavanaja i pradumanaja akcyja, jakaja nakiravanaja suprać pravaachoŭnych orhanaŭ», — paviedamiła jana.
Aboznaja prosić dałučyć da materyjałaŭ spravy tałon-paviedamleńnie, što padadzienaja zajava ŭ Frunzienski RUUS ab uzbudžeńni kryminalnaj spravy suprać abvinavačanaha za paklop. A taksama pryniać miery da redakcyi, jakaja apublikavała raspaŭsiudžanyja źviestki, jakija haniać jaje honar i hodnaść. Dałučyć skrynšoty publikacyj ab razhladzie kryminalnaj spravy ŭ dačynieńni da Kapanajki.
Da materyjałaŭ suda prykładzienaja kvitancyja ab kampiensacyi materyjalnaj škody.
