Pastarnak: Jakija źmieny ŭ Kanstytucyju? Usich cikavić adno: kali jon sydzie
«Ja naziraju za našaj revalucyjaj ź viasny minułaha hoda, z samaha jaje pačatku, — piša ŭ fejsbuku vieteran vydavieckaj spravy Barys Pastarnak. — I ni razu ni na adnym mitynhu albo demanstracyi nie bačyŭ nivodnaha płakata, nie čuŭ nivodnaha patrabavańnia pra kanstytucyju. Nikoha jana zusim nie chvalavała. Narod vydatna razumieŭ, što prablemy Biełarusi — zusim nie ad niedaskanałaści jaje kanstytucyi!
Łozunh byŭ adzin, možna skazać nie łozunh, a maleńnie: «Sychodź!» Nadakučyŭ. Dastaŭ, — piša Barys Pastarnak. — Straciŭ ŭjaŭleńnie ab realnaści. Straciŭ maralnyja aryjenciry.
Ciapier čuvać razmovy, što, maŭlaŭ, upuścili momant u žniŭni, mahli dacisnuć. Dy nie ŭpuścili! Heta taksama nacyjanalnaja śpiecyfika: spadziavalisia ŭsio ž taki na reštki sumleńnia, na reštki zdarovaha sensu. Nu, ciabie ž Baćkam nazyvali, chtości navat całkam surjozna. Što ž ty, sam nie bačyš, što tvoj čas syšoŭ? Nu adydzi ŭ bok, daj ludziam žyć. Nadakučyła ž ciabie bajacca i ŭciahvać hałovy ŭ plečy ad tvaich raznosaŭ. Nie pracuje heta ŭžo. Daj dychać, samim prymać rašeńni. Daj pamylacca ŭrešcie — žyćcio papravić, a nie tvaja palicejskaja ahłobla. Narmalnaja jeŭrapiejskaja kraina, narmalnyja ludzi. Vydatna jana spravicca biez pahaniataha z puhaj, — piša Pastarnak. —
I tut raptam vynikam Usiebiełaruskaha schodu — a naohuł vynikam usienarodnaha pratestu, pakolki VNS byŭ abvieščany trybunaj nacyjanalnaha dyjałohu — stanovicca abiacańnie «padpravić» asnoŭny zakon. Dy kaho jon cikavić, boh ty moj! Usich zajmaje tolki adno — kali sydzie aŭtar hetych abiacańniaŭ. Potym usio astatniaje, potym», — piša Pastarnak.
«Čarhovy machlož, padmiena paniaćciaŭ — voś i ŭvieś vynik hetaha UNS», — padvodzić vynik Barys Pastarnak.
