Za spryjańnie kancertam Hazmanava, Valeryi, Stasa Michajłava. U Homieli eks-ideałahiniu horada asudzili na 4,5 hoda za karupcyju
Siońnia sud vynies pryhavory za karupcyju byłoj načalnicy ŭpraŭleńnia ideałahičnaj raboty, kultury i pa spravach moładzi Homielskaha harvykankama Kaciarynie Dziehciarovaj i zasnavalniku Homielskaha pradziusarskaha rekłamnaha centra «Art Vork» Jaŭhienu Kiryle, piša Tut.by.
Dziehciarovaj dali 4,5 hady pazbaŭleńnia voli ŭ kałonii ahulnaha režymu i štraf 350 bazavych (10 150 rubloŭ), Kiryła atrymaŭ štraf u 500 bazavych (14,5 tys. rubloŭ).
Prakuror prasiŭ dla eks-čynoŭnicy pakarańnie ŭ vyhladzie piaci hadoŭ pazbaŭleńnia voli, dla Kiryły — štraf 1 tysiaču bazavych (29 tysiač rubloŭ).
36-hadovuju Dziehciarovu zatrymali ŭ siaredzinie sakavika minułaha hoda.
Pavodle viersii śledstva, jana, źjaŭlajučysia dziaržsłužačaj, brała chabar, pačynajučy ź vieraśnia 2014 hoda da sakavika 2020-ha. Hrošy nibyta atrymlivała ad pradstaŭnikoŭ pryvatnych kampanij, jakija zajmajucca arhanizacyjaj kancertaŭ, u jakaści ŭznaharodžańnia za pieramohu ŭ konkursnych tarhach i svoječasovuju apłatu pa damovie.
U spravie kala dziesiaci epizodaŭ. U ich fihurujuć kancerty rasijskich zorak Stasa Michajłava, Stasa Pjechi, Safii Rataru, Kryściny Arbakajcie, Valeryi, Aleha Hazmanava i inšych, a taksama tych, chto hetyja kancerty arhanizoŭvaŭ — pryvatnaje ŭnitarnaje pradpryjemstva «Art-Kancert», rasijskaje TAA «Ekspart Mjuzik» i homielski pradziusarski rekłamny centr «Art Vork». Mienavita ich pradstaŭniki, pa viersii śledstva, davali chabary Dziehciarovaj za «spryjalnaje rašeńnie pytańniaŭ». Ale abvinavačany pa spravie ŭ sudzie tolki adzin ź ich — zasnavalnik Homielskaha pradziusarskaha rekłamnaha centra «Art Vork» Jaŭhien Kiryła.
Usiaho eks-čynoŭnica, na dumku śledstva, pryniała ad pryvatnych asob kala čatyroch tysiač dalaraŭ plus padarunki ŭ vyhladzie smart-hadzińnika i płanšeta.
I Dziehciarova, i Kiryła vinu pryznali całkam. U abodvuch byli jaŭki z pavinieńniem i čystasardečnaje pryznańnie.
