«Apošni raz takoje abvinavačvańnie tyčyłasia vybuchu ŭ minskim mietro». U Smarhoni sudziać halšanca za teraryzm
11 lutaha sud Smarhonskaha rajona praciahnuŭ razhlad spravy ŭ dačynieńni da Ivana Viarbickaha. Na sudzie vystupili śviedki, daśledavali rečavyja dokazy, piša «Rehijanalnaja hazieta».
Šulžycki pracuje nastaŭnikam fizkultury. 21 kastryčnika jon išoŭ pa centry Ašmianaŭ, kali da jaho padjechali supracoŭniki milicyi i paprasili paŭdzielničać u pieratrusie ŭ jakaści paniatoha. Šulžycki bačyŭ, jak Viarbicki rvie dakumient, jaki jamu dali supracoŭniki, a paśla jon ža raźbiŭ telefon ab mašynu. Pa słovach śviedki, anijakaj ahresii z boku abvinavačanaha nie zaŭvažyŭ.
Šulžyckaha advieźli nazad u Ašmiany, dalej jon kamunikavaŭ tolki sa śledčym na papiarednim śledstvie.
Advakat Kryvałapaŭ chadajničaŭ ab vykliku śviedak Mulinkovaj i Mardovič, jakija byli ŭ čacie «Ašmiany», dzie abvinavačany pakinuŭ kamientary, što lahli ŭ asnovu kryminalnaj spravy. Mulinkova i Mardovič pajaśnili, što nie ŭspryniali hetyja dopisy surjozna. Abiedźvie skazali, što ŭspryniali kamientary ŭ telehram-čacie jak žart.
Abaronca Viarbickaha zaŭvažyŭ, što paviedamleńni Viarbickaha dahetul zastajucca dastupnymi ŭ čacie «Ašmiany».
— Moj padabaronny abvinavačvajecca nie ŭ zaklikach da aktu teraryzmu. Jaho abvinavačvajuć u asabliva ciažkim złačynstvie. Apošni raz takoje abvinavačvańnie tyčyłasia vybuchu ŭ mietro ŭ Minsku. Orhany papiaredniaha śledstva i dalej dziaržaŭny abvinavaŭca ŭsprymajuć dziejańni majho padabaronnaha jak zvyš pavyšanuju hramadskuju niebiaśpieku — akt teraryzmu. To čamu nie pryniatyja ŭsie miery, kab hetyja dopisy ŭ telehram-kanale byli likvidavanyja? — zapytaŭsia abaronca.
Sam Viarbicki zajaviŭ, što sud pa jaho spravie — heta pakazalny praces.
U sudzie prahladzieli videazapis pieratrusu, sudździa jašče raz daśledavała vyniki kampjutarna-techničnaj ekśpiertyzy. Dziaržaŭny abvinavaŭca chadajničaŭ ab vykliku Bialajeva, jaki byŭ paniatym pry pieratrusie ŭ Viarbickaha. Abvinavaŭca abiacaŭ zabiaśpiečyć jaŭku Bialajeva, bo jon prachodzić terminovuju słužbu ŭ armii.
Nastupnaje pasiadžeńnie projdzie 16 lutaha.
14 kastryčnika Ivan Viarbicki pakinuŭ niekalki kamientaryjaŭ u telehram-čatach «Ašmiany» i «Astraviec dla žyćcia», jakija abvinavačvańnie rasceńvaje jak akt teraryzmu. 21 kastryčnika Viarbicki razarvaŭ pastanovu ab pieratrusie. U toj ža dzień u domie baćkoŭ u Halšanach, dzie žyŭ Viarbicki, padčas pieratrusu znajšli niekalki dziasiatkaŭ patronaŭ i porach.
Viarbickaha abvinavačvajuć pa čatyroch artykułach Kryminalnaha kodeksa. U tym liku i ŭ akcie teraryzmu.
